«Nur Otan» partiiasy qazaqstandyqtardy árbir óńirdi, qala men aýdandy 5 jylǵa damytýdyń negizgi basymdyqtarymen tanystyrýdy jalǵastyrýda. Primaries.kz saitynda 216 sailaýaldy baǵdarlamanyń jobalary usynyldy, olardy halyqtyń pikirin eskere otyryp pysyqtaýdy josparlap otyr, dep habarlaidy "Ult aqparat" partiianyń baspasóz qyzmetine silteme jasap.
Máselen, Aqtóbe oblysynyń sailaýaldy baǵdarlamasynyń jobasynda jyl saiyn keminde 20 myń jańa jumys ornyn qurý jáne 2025 jylǵa qarai ortasha jalaqyny keminde 200 myń teńgege deiin arttyrý mindeti qoiylyp otyr. Jyl saiyn keminde myń adamdy qaita daiarlaý, keminde eki myń adamdy qysqa merzimdi oqytý jáne sheteldik jumys kúshine kvotany qysqartý júrgiziletin bolady.
Oblys halqynyń 29%-y aýyldyq jerlerde turatynyn eskere otyryp, óńirde eki jylyjai keshenin, eki sút-taýar fermasyn, qus fabrikasyn salýdy jáne IQM basyn ulǵaitýdy josparlap otyr. Aýyl sharýashylyǵynyń dástúrli emes túrlerin – ara sharýashylyǵyn, maral sharýashylyǵyn, jidek daqyldaryn ósirýdi damytýǵa erekshe nazar aýdarylatyn bolady.
Óńirdiń tranzittik áleýetin damytý úshin oblystyq mańyzy bar avtojoldardy, sondai-aq aýdandyq mańyzy bar 2350 km joldardy salý jáne qaita jańartý josparlanýda. Bul sharalar 2025 jylǵa qarai jaqsy jáne qanaǵattanarlyq jaǵdaidaǵy jergilikti mańyzy bar joldardyń úlesin 56-dan 85%-ǵa deiin arttyrýǵa múmkindik beredi.
Partiia qorshaǵan ortaǵa aýyrtpalyqty azaitý maqsatynda Aqtóbe hrom qosylystary zaýytynyń tehnologiialyq jabdyqtarynyń shań jáne gaz tazartý qondyrǵylaryn qaita qurý jáne 2021 jyly 9 QTQ poligonyn salý mindetin qoiyp otyr.
Óńirde áli kúnge deiin úsh aýysymdy mektepter jumys isteidi. Bilim berý sapasyn arttyrý úshin 16 jańa mektep salynady. Jalpy 1 jastan 6 jasqa deiingi balalardy mektepke deiingi mekemelermen qamtýdy 2025 jylǵa qarai 86%-ǵa deiin jetkizý josparlanýda.
«Kedergisiz keleshek» partiialyq jobasy aiasynda 2021 jyly múmkindigi shekteýli jandarǵa arnalǵan 150 oryndyq ońaltý ortalyǵyn jáne 2022 jyly sport keshenin salý josparlanýda.
Batys Qazaqstan oblysynyń sailaýaldy baǵdarlamasy jobasynyń derekteri boiynsha óńirde qazirgi zamanǵy tehnologiialardy engizý jáne óndiristiń jańa túrlerin igerý esebinen damyǵan agroónerkásiptik keshendi qurý jónindegi jumys jalǵasady.
Partiia sút keshenin, 27 bordaqylaý alańyn salýdy, sýarmaly jer kólemin 56 myń gektardan 85,0 myń gektarǵa deiin keńeitýdi usynady. Bul sharalar shamamen 10 myń sharýany keshendi qoldaýmen qamtýǵa múmkindik beredi.
Sondai-aq, partiia koronavirýstyq pandemiiadan zardap shekken ekonomikalyq sektorlardyń iskerlik belsendiligin qalpyna keltirýge kómektesýge nietti.
Óńirde jyl saiyn «Qarapaiym zattar ekonomikasy», «BJK-2025», «Eńbek» jáne t.b. baǵdarlamalary boiynsha keminde 7 myń jas jumysqa ornalasatyn bolady.
Sonymen qatar, 800 shaqyrymnan astam joldy jóndeý josparlanýda, 59 aýyl ortalyqtandyrylǵan sýmen qamtamasyz etiledi, 73 eldi mekende sýmen jabdyqtaýdyń keshendi blok-modýlderi ornatylady. Jyl saiyn óńirde 480 myń sharshy metr turǵyn úidi iske qosý josparlanyp otyr, suryptaý jelileri bar 2 QTQ poligony iske qosylady.
Búgingi kúni oblys turǵyndaryn tolǵandyratyn mańyzdy máselelerdiń biri - gazǵa joǵary tarif (halyq úshin 17,24 teńge/m3). Tarifti tómendetý maqsatynda «Nur Otan» partiiasy Orynbor GÓZ-nen alynatyn tabiǵi gazdyń qunyn tómendetý boiynsha QR jáne RF Úkimetteri deńgeiinde kelissózder júrgizý mindetin qoiyp otyr. Sondai-aq, halyq pen kásipkerler arasynda tarifti saralaý máselesi qaralady.
Densaýlyq saqtaý salasyndaǵy qyzmetterdiń sapasyn arttyrý úshin partiia 2 emhana, aýrýhanalarǵa 3 korpýs salýdy josparlap otyr. Bilim berý sapasy men qoljetimdiligin qamtamasyz etý maqsatynda partiia músheleri 21 jalpy bilim beretin mektep salý, sondai-aq mektepter men balabaqshalardy beinebaqylaý júielerimen 100% jabdyqtaý boiynsha mindetter qoiyp otyr.
Mańǵystaý oblysynyń sailaýaldy baǵdarlamasynyń jobasynda óńirdiń damý rezervteriniń biri Aqtaý, Quryq teńiz porttary jáne «Aqtaý teńiz porty» AEA, sondai-aq, Aqtaý jáne Jańaózen qalalaryndaǵy indýstriialyq aimaqtar bolyp tabylady. Partiia munai óndirý kólemin saqtaýdy qamtamasyz etýge, sheteldik investitsiialardy tartýǵa jáne «Aqtaý teńiz porty» AEA-da injenerlik infraqurylymdy qurýdy aiaqtaýǵa yqpal etetin bolady.
Turǵyn úimen qamtamasyz etý deńgeiin arttyrý úshin qalalarda 48 kóppáterli úi jáne oblys aýdandarynda 89 úi salynady. Partiia Aqtaý qalasyndaǵy jańa onkologiialyq dispanserdiń jáne Jańaózen qalasyndaǵy qalalyq aýrýhananyń terapevtik korpýsynyń qurylysyn aiaqtaýǵa, aýyldyq eldi mekenderde 7 otbasylyq-dárigerlik ambýlatoriia qurylysyn aiaqtaýǵa qol jetkizetin bolady.
3 aýysymdyq oqytýdy joiý úshin qalalar men aýdandarda 20 jańa mektep, jumys istep turǵan mektepterge japsarlas qurylystar salý, úide qashyqtyqtan oqytý júrgizý úshin az qamtylǵan otbasylardan shyqqan balalardy kezeń-kezeńimen kompiýterlik tehnikamen qamtamasyz etý josparlanýda.
Atyraý oblysynda 5 jyl ishinde 103 myń jańa jumys orny ashylady. Jańa biznes-ideialardy iske asyrý úshin 141 jobaǵa óteýsiz granttar beriletin bolady.
Óńir turǵyndaryn tolǵandyratyn ekologiia máseleleri belsendi túrde sheshiletin bolady. Mysaly, munai-gaz kásiporyndarynda atmosferalyq aýany onlain-rejimde baqylaý júiesi ornatylady.
Sondai-aq, 3,5 mln sharshy metr turǵyn úi salý, 300 km-ge jýyq avtomobil joldaryn jóndeý, 63,5 km sý qubyry jelilerin salý, Qurmanǵazy aýdany Aqkól aýylyndaǵy sý tazartý ǵimaratyn qaita jańartý josparlanýda.
Sapaly bilimge qoljetimdilikti qamtamasyz etý maqsatynda 9 jańa mektep jáne 56 balabaqsha salynady. Óńirde óner mektebi, mýzyka mektebi jáne oqýshylar saraiy ashylady.
Jastardy jan-jaqty qoldaý úshin óńirde jyl saiyn keminde 5 myń jasty jumysqa ornalastyrý josparlanýda. Partiia 6 stýdenttik jataqhana salý mindetin qoiyp otyr.
