Elordadaǵy «Nur Astana» meshitine Ábý Nasyr ál-Farabi esimi berildi, dep habarlaidy QazAqparat.
Esterińizge sala keteiik, ótken aptada Bas múfti Naýryzbai qajy Taǵanulynyń tóraǵalyǵymen ótken Qazaqstan musylmandary dini basqarmasynyń tóralqa májilisine «Nur Astana» meshitiniń ataýyn ózgertý jónindegi Ǵulamalar keńesinen usynys túsken bolatyn.
QMDB bólim basshylary, oblys imamdary men Ortalyq apparat qyzmetkerleri meshit ataýynyń ózgerýin qoldap, daýys berdi. Nátijesinde 15 jyldyq tarihy bar meshit endigi tańda oishyl, ǵulama Ábý Nasyr ál-Farabi esimimen atalatyndyǵy týraly sheshim qabyldandy.
Táýelsizdiktiń 30 jyldyǵyna orai qabyldanǵan sheshim nátijesinde búgin resmi túrde burynǵy meshit ataýy jazylǵan taqtaisha alynyp, ornyna Ábý Nasyr ál-Farabi atyndaǵy jańa meshit ataýymen taqtaisha ornatyldy.
«Meshitti uly oishyldyń esimimen atalýynda úlken taǵylym men tálim jatyr. Álemge ilim men bilimniń shýaǵyn shashqan «Ekinshi ustaz» naǵyz musylmandyq sipatqa ie tulǵa bolǵan. Ádiletti, imanyna berik, azǵa qanaǵat, barǵa táýba etken, óte qarapaiym qasietke ie islam áleminiń ǵulamasynan alar ónegemiz orasan zor. Barsha musylmandy baqytty bolýǵa shaqyrǵan, ómir boiy qaiyrymdy qalada turýdy armandaǵan asqaq alyptyń atymen atalatyn «Ábý Nasyr ál-Farabi» meshitiniń ishi jamaǵatqa, syrty bereke men birlikke tolǵai!», - dep atap ótedi Qazaqstan musylmandary dini basqarmasynyń baspasóz qyzmetinen.
