ەلورداداعى «نۇر استانا» مەشٸتٸنە ەبۋ ناسىر ەل-فارابي ەسٸمٸ بەرٸلدٸ, دەپ حابارلايدى قازاقپارات.
ەستەرٸڭٸزگە سالا كەتەيٸك, ٶتكەن اپتادا باس مٷفتي ناۋرىزباي قاجى تاعانۇلىنىڭ تٶراعالىعىمەن ٶتكەن قازاقستان مۇسىلماندارى دٸني باسقارماسىنىڭ تٶرالقا مەجٸلٸسٸنە «نۇر استانا» مەشٸتٸنٸڭ اتاۋىن ٶزگەرتۋ جٶنٸندەگٸ عۇلامالار كەڭەسٸنەن ۇسىنىس تٷسكەن بولاتىن.
قمدب بٶلٸم باسشىلارى, وبلىس يمامدارى مەن ورتالىق اپپارات قىزمەتكەرلەرٸ مەشٸت اتاۋىنىڭ ٶزگەرۋٸن قولداپ, داۋىس بەردٸ. نەتيجەسٸندە 15 جىلدىق تاريحى بار مەشٸت ەندٸگٸ تاڭدا ويشىل, عۇلاما ەبۋ ناسىر ەل-فارابي ەسٸمٸمەن اتالاتىندىعى تۋرالى شەشٸم قابىلداندى.
تەۋەلسٸزدٸكتٸڭ 30 جىلدىعىنا وراي قابىلدانعان شەشٸم نەتيجەسٸندە بٷگٸن رەسمي تٷردە بۇرىنعى مەشٸت اتاۋى جازىلعان تاقتايشا الىنىپ, ورنىنا ەبۋ ناسىر ەل-فارابي اتىنداعى جاڭا مەشٸت اتاۋىمەن تاقتايشا ورناتىلدى.
«مەشٸتتٸ ۇلى ويشىلدىڭ ەسٸمٸمەن اتالۋىندا ٷلكەن تاعىلىم مەن تەلٸم جاتىر. ەلەمگە ٸلٸم مەن بٸلٸمنٸڭ شۋاعىن شاشقان «ەكٸنشٸ ۇستاز» ناعىز مۇسىلماندىق سيپاتقا يە تۇلعا بولعان. ەدٸلەتتٸ, يمانىنا بەرٸك, ازعا قاناعات, بارعا تەۋبا ەتكەن, ٶتە قاراپايىم قاسيەتكە يە يسلام ەلەمٸنٸڭ عۇلاماسىنان الار ٶنەگەمٸز وراسان زور. بارشا مۇسىلماندى باقىتتى بولۋعا شاقىرعان, ٶمٸر بويى قايىرىمدى قالادا تۇرۋدى ارمانداعان اسقاق الىپتىڭ اتىمەن اتالاتىن «ەبۋ ناسىر ەل-فارابي» مەشٸتٸنٸڭ ٸشٸ جاماعاتقا, سىرتى بەرەكە مەن بٸرلٸككە تولعاي!», - دەپ اتاپ ٶتەدٸ قازاقستان مۇسىلماندارى دٸني باسقارماسىنىڭ باسپاسٶز قىزمەتٸنەن.
