Amerikalyq Novavax biotehnologiialyq kompaniiasy Ulybritaniiada júrgizilgen synaq koronavirýsqa qarsy vaktsinasynyń shamamen 90 paiyz tiimdi ekenin kórsetti dep habarlady. Kompaniia 28 qańtarda taratqan habarlamasynda "Covid-ke qarsy ázirlegen vaktsina virýs mýtatsiiasyna qarsy tura alady" dep málimdegenmen "vaktsinanyń Ońtústik Afrikada tarap jatqan mýtatsiiasynan qorǵaý dárejesi edáýir tómen" dedi.
Densaýlyq saqtaý salasynyń mamandary koronavirýsqa qarsy vaktsinalar alǵash Ulybritaniia, Braziliia jáne Ońtústik Afrikada anyqtalǵan virýstyń ózgergen túrine qajetti dárejede tótep bere ala ma degen máselege alańdap otyrǵan shaqta kompaniia málimdeme jasady.
Osy apta basynda Moderna jáne Pfizer/BioNTech kompaniialary ózderi ázirlegen vaktsinanyń britandyq shtamǵa tótep bere alatynyn, biraq Ońtústik Afrikadaǵy túrinen qajetti dárejede qorǵai almaitynyn aitqan.
Novavax kompaniiasynyń aitýynsha, Ulybritaniiada 15 myń adam arasynda júrgizilgen synaq Novavax vaktsinasynyń 89,3 paiyz tiimdi ekenin kórsetken. Bul tiimdiligi 95 paiyz delingen Pfizer/BioNTech jáne Moderna vaktsinalarynyń kórsetkishterine jaqyn. Synaq Ulybritaniia virýstyń jyldamyraq taraityn túrine kezigip, naýqastar kúrt kóbeigen shaqta júrgizilgen. Sol kezde vaktsina odan tiimdi qorǵai alatynyn dáleldegen. Al Ońtústik Afrikada júrgizilgen ekinshi kezeńdegi synaq Novavax vaktsinasynyń VICh juqpaǵan adamdardy koronavirýstan 60 paiyz ǵana qorǵai alatynyn kórsetken.
