Elordada Ginnestiń rekordtar kitabyna engen, álemge áigili «Notre Dame de Paris» miýzikliniń qazaq tilindegi tusaýkeseri ótti, dep habarlaidy QazAqparat tilshisi.
Mádeniet jáne sport ministrliginiń uiymdastyrýymen «Qazaqconcert» memlekettik kontserttik uiymy usynǵan, ańyzǵa ainalǵan «Notre Dame de Paris» miýzikliniń qazaq tilindegi premerasynda zalda ine shanshar oryn bolmady. Miýzikl Astanada alǵash ret qoiylyp jatqanyn aita ketý kerek.
Uiymdastyrýshylardyń aitýynsha, keleshekte álemdik miýzikldi Qazaqstannyń barlyq qalalarynda qoiý josparlanǵan. Shynaiy ǵashyqtyq pen satqyndyq hikaiasy, senim men ǵajaiypqa toly qoiylym kɵrermenderdi tamsandyrǵany zaldaǵy qoshemetten aiqyn baiqalǵany haq. Sahnada XX ǵasyrdyń eń úzdik ənderi shyrqaldy. Erekshe atmosfera syilaityn frantsýzdyq shanson jelisindegi miýziklin 24 jeltoqsanǵa deiin Beibitshilik jəne Kelisim saraiynda tamashalaýǵa bolady.
Premer aldynda «Notre dame de Paris» miýzikliniń avtory, belgili italiandyq-frantsýzdyq kompozitor Rikkardo Kochchante, «Qazaqkontsert» MKU direktory Jeńis Seidýllauly, qoiýshy rejisser Robert Marien, miýzikl prodiýseri Nikolia Talar, qazaq tilindegi librettonyń avtory, belgili aqyn Serikzat Dúisenǵazynyń qatysýymen baspasóz máslihaty ótti.
«Búgin shynynda da aq túieniń qarny jarylǵan kún. Bizdiń jas teatr áńgimeniń shyny kerek, endi ǵana aiaǵynan turyp kele jatyr desek te bolady. Óitkeni, úsh jyldyq qana tarihy bar teatrymyzdyń álemdi tańǵaldyrǵan, 11 millionnan astam adam kórgen, álemniń toǵyz tiline aýdarylǵan miýzikldi moinyna alyp jatqany - úlken jetistik. Álemdiń mádeniettiń jaýhary sanalatyn aty ańyzǵa ainalǵan «Notre Dame de Paris» miýzikliniń avtory Rikkardo Kochchante, mine, ortamyzda otyr. Osydan 20 jyl buryn osynaý álemdegi myqty kompozitordyń ánderin tamsana tyńdai júrip, 20 jyldan keiin Qazaqstanda bas qosamyz degen oi basymyzǵa kelmep edi. Sondyqtan, men ózimizdi ǵana emes, barlyq qazaqstandyqtardy búgingi premeramen quttyqtaǵym keledi», - dedi Jeńis Seidýllauly.
Álemdik miýzikldiń qazaq tiline qalai aýdarylǵany týraly elimizge belgili aqyn Serikzat Dúisenǵazy keńirek aityp berdi. Aqynnyń aitýynsha, «Notre Dame de Paris» miýzikli tek bizde ǵana emes, dúnie júziniń birneshe tilderine aýdarylǵan.
«Eń birinshi Briýsselde, keiin Jenevada, odan soń London sekildi álemniń úlken qalalarynda qoiylǵan. Keiin Kanada, Ońtústik Koreia, Resei, Qytai sekildi úlken memleketterde de sahnalanǵan. Miýzikldiń prodiýserleri bir mátin bolýy týrasynda bizge talap qoidy. Biz óz erkimizben aýdara almadyq, iaǵni poeziiamyzdy erkin qosa almadyq. Mátin qandai bolsa, dál maǵynasyn beretin sózder arqyly qiiýlastyryp aýdardyq», - deidi aqyn.
Serikzat Dúisenǵazynyń aitýyna qaraǵanda, miýzikldiń mátininiń ózi óte jeńil áli túsinikti jazylǵan.
«Miýzikldiń avtory Rikkardo Kochchante maǵan kórkem poeziiańyzdyń bizge qajeti joq dep talap qoidy. Bizge eń bastysy - bul shyǵarmada maǵynany dál berip, óleń túrinde jeńil, jalpy adam túsinetindei bolýy kerek dedi. Iaǵni, avtor maǵan «ziialy qaýymǵa, aqyndar nemese jazýshylarǵa túsinikti tilmen ǵana jazbańyz» dep eskertti. Birinshi aýdarmamyz poeziialyq jaǵynan tereń bolyp ketti. Soǵan bailanysty olar maǵan kishkene eskertý de berdi. Demek, avtorlar bizge qarapaiym zaýyt jumysshysy nemese malshy, jýrnalist nemese jazýshy kóre beretindei bolýy kerektigine nazar aýdartty», - deidi ol.
Aqynnyń aitýynsha, miýzikldiń aýdarmasyn frantsýzdardyń prodiýsserlik kompaniiasy egjei-tegjeili teksergen.
«Aýdarma barysyn miýzikldiń avtory Rikkardo Kochchanteniń ózi qadaǵalap otyrdy. Sebebi, olar qazaqsha bilmese de, óz jaǵynyń aýdarmashylarymen, biz jaqtyń aýdarmashylarymen tyǵyz jumys júrgizdi. Óte kóp ter tóktik. Frantsiiaǵa eki márte bardym, Qazaqstanǵa olar keldi. Bes-alty aidyń ishinde osyndai jumys jasaldy. Oǵan men ǵana emes, basqa úlken aqyndar da atsalysty. Frantsýz kompaniiasy birneshe aqynnyń ishinen meni tańdap alǵan eken. Biraq, bul rette bir erekshelik týraly da aita ketý kerek. Buǵan deiin án mátinderin jazǵandyqtan, sonyń maǵan paidasy tidi me dep oilaimyn. Sebebi, bul jerde búkil oi men filosofiiany ánniń ishine syiǵyzý mindeti turdy. Osy máselege kelgen kezde aýqymdy jumystar júrgizdik», - deidi Serikzat Dúisenǵazy.
