Foto: ©️ Tengrinews.kz / Álihan Sariev
Endi erli-zaiyptylardyń notarialdy kýálandyrylǵan kelisimin eGov mobile qosymshasynda onlain túrde resimdeýge bolady, dep habarlaidy "Ult aqparat" Ulttyq aqparattyq tehnologiialar (UAT) baspasóz qyzmetine silteme jasap.
"QR Ádilet ministrliginiń, respýblikalyq notariattyq palatanyń jáne «Ulttyq aqaparattyq tehnologiialar» AQ aqparattyq júieleri arasyndaǵy integratsiia azamattarǵa notariýsqa barmai-aq notariat kýálandyrǵan qujattardy birneshe minýt ishinde kýálandyrýǵa múmkindik beredi.
eGov mobildi qosymshasynyń «eNotary» qyzmetinde erli-zaiyptylardyń kelisimin talap etetin qujattardy resimdeýdiń qosymsha optsiiasy paida boldy" - delingen habarlamada.
Kelisim onlain rejimde biometriialyq tekserýden ótý arqyly jasalady, sodan keiin notariýs klienttiń derekterin tekseredi, osylaisha kelisimdi rastaǵan soń, notarialdy kýálandyrylǵan qujat jasalady.
«Ózderińiz biletindei, biyl sáýir aiynda eGov mobile mobildi qosymshasynda «eNotary» qyzmeti iske qosyldy jáne búginde ol qazaqstandyqtar arasynda tanymal. Azamattardyń osy qyzmetti paidalana otyryp, álemniń kez kelgen núktesinen qajetti qujatty kýálandyrýǵa múmkindigi bar. Bul qyzmet yńǵaily, óitkeni qujattardy rásimdeý úshin notariýsty izdep, oǵan barýdyń qajeti joq. Endi erli-zaiyptylardyń kelisimin birneshe minýt ishinde onlain rejiminde alýǵa bolady», - deidi «Ulttyq aqparattyq tehnologiialar» AQ Basqarma tóraǵasy Rostislav Koniashkin.
Erli-zaiyptylardyń kelisimin alý úshin:
- eGov Mobile qosymshasynda avtorizatsiiadan ótý;
- basty bette «eNotary» qyzmetin ashý;
- tizimnen áreket túrin tańdaý - «kelisim»;
- ótinish formasyn toltyrý jáne biometriialyq tekserýden ótý;
- beineqońyraý arqyly jubaiynyń kelisimin alý;
- notarialdyq qyzmetke aqy tóleý qajet.
"Beineqońyraý aiaqtalǵannan keiin paidalanýshy «Notariattyq is-áreketter» bóliminde ótinimniń mártebesin kóre alady. EGov Mobile qosymshasynyń «Tsifrlyq qujattar» bólimindegi QR kodty skanerleý arqyly beinekameranyń kómegimen resmi kýálandyrylǵan senimhattyń túpnusqalyǵyn tekserýge bolady.
Jańa senimhat «Tsifrlyq qujattar» servisinde qoljetimdi bolady jáne ony talap etý orny boiynsha usynýǵa bolady" - delingen habarlamada.
