Qazaqstannyń birqatar óńirinde 1 shildede qolaisyz aýa raiy saqtalady, dep habarlaidy Ult.kz.
Sinoptikterdiń málimetinshe, eldiń batysy men soltústiginde nóser jańbyr, naizaǵai, burshaq, daýyl jáne ekpindi jel kútiledi. Al shyǵys óńirlerde aptap ystyq saqtalyp, órt qaýpi kúsheiedi.
Buǵan deiin jariialanǵan daýyldy eskertýge sáikes, 29 maýsym men 2 shilde aralyǵynda Batys Qazaqstan, Atyraý, Mańǵystaý jáne Aqtóbe oblystarynda qatty jańbyr jalǵasady. Al 29 maýsym men 5 shilde aralyǵynda Qostanai, Soltústik Qazaqstan, Aqmola, Pavlodar jáne Ulytaý oblystarynda da nóser jaýyn kútiledi.
Sonymen qatar, 1-5 shilde aralyǵynda Abai jáne Shyǵys Qazaqstan oblystarynda kúndiz aýa temperatýrasy 30-38 gradýsqa deiin kóterilip, qatty ystyq saqtalady. Osyǵan bailanysty atalǵan óńirlerde joǵary jáne tótenshe órt qaýpi jariialanǵan.
1 shildede Batys Qazaqstan, Atyraý, Mańǵystaý, Aqtóbe, Qostanai, Soltústik Qazaqstan, Aqmola, Pavlodar oblystarynda jańbyr, naizaǵai, kei jerlerde qatty jańbyr, burshaq, daýyl jáne sekýndyna 15-28 metrge deiin jetetin ekpindi jel boljanyp otyr.
Ortalyq jáne shyǵys óńirlerde de aýa raiy qubylmaly bolady. Qaraǵandy, Ulytaý, Abai jáne Shyǵys Qazaqstan oblystarynyń birqatar aýdanynda jańbyr jaýyp, naizaǵai oinaidy, jel kúsheiedi. Abai oblysynda kúndiz aýa temperatýrasy 35-37 gradýsqa, al Shyǵys Qazaqstan oblysynda 35-36 gradýsqa deiin kóteriledi.
Ońtústik jáne ońtústik-shyǵys óńirlerde de turaqsyz aýa raiy kútiledi. Almaty, Jetisý, Jambyl, Túrkistan jáne Qyzylorda oblystarynyń kei jerlerinde jańbyr, naizaǵai, burshaq, daýyl jáne ekpindi jel bolady. Almaty oblysynda kei aýdandarda shańdy daýyl boljanǵan. Almaty qalasynda túnde qatty jańbyr jaýýy múmkin.
Elordada 1 shildede jańbyr jaýyp, naizaǵai oinaidy, kúndiz burshaq túsip, daýyl turýy yqtimal. Jeldiń ekpini sekýndyna 15-20 metrge deiin jetedi.
Sinoptikter turǵyndarǵa aýa raiynyń qolaisyzdyǵyna bailanysty alys jolǵa shyqqanda saq bolýǵa, daýyl kezinde qaýipsizdik sharalaryn saqtaýǵa jáne órt qaýpi joǵary óńirlerde otty abailap paidalanýǵa keńes beredi.
