Norvegiianyń astanasy Oslo qalasynan 25 shaqyrym jerde ornalasqan Ask shaǵyn kentinde kóshkin júrgennen tórt kún ótken soń qutqarýshylar komandasy qaza tapqan besinshi adamnyń denesin tapty, dep habarlaidy QazAqparat Euronews agenttigine silteme jasap.
Qutqarýshylar onda túni boiy jumys istegen. Izdeý jumystaryn borpyldaq topyraq, aýa raiynyń qolaisyzdyǵy jáne jaryqtyń jetispeýshiligi qiyndatty.
«Biz kóshkin júrgen aýdanda óte kúrdeli jumys atqardyq. Mundaǵy jer jumsaq, jabysqaq, arasynda synyqtar óte kóp. Jerdi batys jaqtan qazýdy, aǵash materialdar men penopolistiroldy qoldanyp, jaiaý júrginshilerge arnalǵan joldar salýdy sheshtik», - dedi qutqarýshylar komandasynyń komandiri Knýt Halvorsen.
Sársenbide júrgen kóshkin saldarynan birneshe turǵyn úi batpaqtyń astynda qalyp qoiǵan. 10 adam zardap shegip, bireýi aýrýhanaǵa jetkizildi, taǵy 11 adam iz-túzsiz joǵalǵandar esebinde tur.
Norvegiianyń premer-ministri Erna Solberg bunyń el tarihyndaǵy osy tektes eń iri oqiǵalardyń biri ekenin málimdedi. 700-den astam jergilikti turǵyn qaýipsiz jerge shyǵaryldy. Bilik taǵy 1500-ǵa jýyq adamdy kóshirý qajet bolýy múmkin ekenin málimdedi.
