Senbi kúni apatqa ushyraǵan «Viking Skai» krýiz laineri Molde ailaǵyna kelip jetti, dep habarlaidy QazAqparat.
Keme ekipajynyń músheleri daýyl kezinde aiaq astynan isten shyqqan keme qozǵaltqyshyn óz kúshimen jóndeýdi bir sátke de toqtatqan joq. Sóitip olar qozǵaltqyshty ishinara otaldyryp, býksir katerleriniń kómegimen Molde jaǵalaýyna jetip jyǵyldy.
Eske sala keteiik, evakýatsiia jumystary túni boiy jalǵasty. Tolqyn deńgeii úsh qabatty úidiń biiktigimen birdei boldy. Krýiz laineriniń jolaýshylaryn tikushaqpen tasymaldaýǵa týra keldi. Tótenshe jaǵdai kezinde kóp adamnyń boiyn qorqynysh bilep, buryn mundai jaǵdaidy kórmegendikten qatty úreilengenderin jasyra almady.
Nátijesinde 463 adam áýe tasymaly arqyly jaǵalaýǵa jetkizildi. Negizi keme bortynda ekipajdy qosqanda barlyǵy 1373 jolaýshy bolatyn.
Sonymen qatar, ekipaj músheleri arasynda Qazaqstannyń eki azamatshasy bar bolyp shyqty. Bul aqparatty Qazaqstannyń Norvegiiadaǵy elshiligi de rastady. Elshiliktiń málimetinshe, bul másele bizdiń diplomatiialyq missiianyń erekshe baqylaýynda.
«Viking Skai» bortyndaǵy bizdiń eki azamatsha oqys oqiǵadan keiin úirenshikti rejimde jumysyn jalǵastyrǵan. Olar bizden kómek suraǵan joq», - dedi elimizdiń Oslodaǵy konsýly Azat Mátenov.
Onyń sózinshe, diplomattar oqiǵa týraly esti salysymen birden jergilikti bilik ókilderine habarlasqan.
Qazirgi ýaqytta alańdaityn eshteńe joq. «Viking Skai» jolaýshylary men ekipajy jergilikti qonaq úige jetkizilgen. Ol jerde barlyǵyna tiisti kómek kórsetiledi.
