Qazaqstanda normativti-quqyqtyq aktilerdiń jobalaryn sybailas jemqorlyqqa qarsy saraptamadan ótkizý institýty qaita ashylady. Bul týraly Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov málim etti, dep habarlaidy QazAqparat.
«Ótken jyly Memleket basshysy Qazaqstan halqyna Joldaýynda normativti-quqyqtyq aktilerdiń jobalaryn sybailas jemqorlyqqa qarsy saraptamadan ótkizý institýtyn qalpyna keltirýdi tapsyrǵan bolatyn. Buryn bul institýt Qazaqstanda bolǵanymen, keiin joiylyp ketken. Bálkim ol tusta tańdalǵan amal-ádister álsiz bolyp, bul tetik tiimdiligin kórsete almasa kerek. Kezinde bul institýttan bas tartylǵanymen, zamannyń ózi munyń zańnamalyq bazany qalyptastyryp, normativti-quqyqtyq aktilerdi ázirleý keziniń ózinde sybailas jemqorlyqty týyndatatyn normalardyń alynyp tastalýyna muryndyq bolar qajetti institýt, qajetti mehanizm ekenin kórsetip berdi. Qazir buǵan qatysty qajetti zańnamalyq normativti-quqyqtyq aktiler qabyldandy. Osy jyldyń 2 qarashasynan bastap Qazaqstanda bul institýt tolyqqandy jumys istei bastady», - dedi Oljas Bektenov.
Onyń aitýynsha konkýrstyq protsedýralaradyń qorytyndysy boiynsha úilestirýshi retinde ál-Farabi atyndaǵy Qazaq ulttyq ýniversiteti aiqyndalǵan. Eki aptanyń ishinde saraptamaǵa myńǵa tarta normativti-quqyqtyq akt kelip túsken. Quramyna 93 maman engen sarapshylar pýly qurylǵan. Memlekettik organdarǵa 70-ke tarta saraptamanyń qorytyndysy joldanǵan.
Oljas Bektenov habarlaǵandai, saraptamaǵa túsken jobalardyń kóptigine bailanysty sarapshylardy jinaý boiynsha qosymsha konkýrs jariialanyp otyr. Qorytyndy beretin sarapshylar joba sońyna deiin jetkenshe ony súiemeldep, onyń talqylanýyna qatysyp, óziniń kózqarasyn dáleldei bilýi tiis. Memleket basshysynyń tapsyrmasymen sarapshylardyń barlyq qorytyndysy ashyq talqylaý úshin jariialanǵan.
