قازاقستاندا نورماتيۆتٸ-قۇقىقتىق اكتٸلەردٸڭ جوبالارىن سىبايلاس جەمقورلىققا قارسى ساراپتامادان ٶتكٸزۋ ينستيتۋتى قايتا اشىلادى. بۇل تۋرالى سىبايلاس جەمقورلىققا قارسى ٸس-قيمىل اگەنتتٸگٸ تٶراعاسىنىڭ بٸرٸنشٸ ورىنباسارى ولجاس بەكتەنوۆ مەلٸم ەتتٸ, دەپ حابارلايدى قازاقپارات.
«ٶتكەن جىلى مەملەكەت باسشىسى قازاقستان حالقىنا جولداۋىندا نورماتيۆتٸ-قۇقىقتىق اكتٸلەردٸڭ جوبالارىن سىبايلاس جەمقورلىققا قارسى ساراپتامادان ٶتكٸزۋ ينستيتۋتىن قالپىنا كەلتٸرۋدٸ تاپسىرعان بولاتىن. بۇرىن بۇل ينستيتۋت قازاقستاندا بولعانىمەن, كەيٸن جويىلىپ كەتكەن. بەلكٸم ول تۇستا تاڭدالعان امال-ەدٸستەر ەلسٸز بولىپ, بۇل تەتٸك تيٸمدٸلٸگٸن كٶرسەتە الماسا كەرەك. كەزٸندە بۇل ينستيتۋتتان باس تارتىلعانىمەن, زاماننىڭ ٶزٸ مۇنىڭ زاڭنامالىق بازانى قالىپتاستىرىپ, نورماتيۆتٸ-قۇقىقتىق اكتٸلەردٸ ەزٸرلەۋ كەزٸنٸڭ ٶزٸندە سىبايلاس جەمقورلىقتى تۋىنداتاتىن نورمالاردىڭ الىنىپ تاستالۋىنا مۇرىندىق بولار قاجەتتٸ ينستيتۋت, قاجەتتٸ مەحانيزم ەكەنٸن كٶرسەتٸپ بەردٸ. قازٸر بۇعان قاتىستى قاجەتتٸ زاڭنامالىق نورماتيۆتٸ-قۇقىقتىق اكتٸلەر قابىلداندى. وسى جىلدىڭ 2 قاراشاسىنان باستاپ قازاقستاندا بۇل ينستيتۋت تولىققاندى جۇمىس ٸستەي باستادى», - دەدٸ ولجاس بەكتەنوۆ.
ونىڭ ايتۋىنشا كونكۋرستىق پروتسەدۋرالارادىڭ قورىتىندىسى بويىنشا ٷيلەستٸرۋشٸ رەتٸندە ەل-فارابي اتىنداعى قازاق ۇلتتىق ۋنيۆەرسيتەتٸ ايقىندالعان. ەكٸ اپتانىڭ ٸشٸندە ساراپتاماعا مىڭعا تارتا نورماتيۆتٸ-قۇقىقتىق اكت كەلٸپ تٷسكەن. قۇرامىنا 93 مامان ەنگەن ساراپشىلار پۋلى قۇرىلعان. مەملەكەتتٸك ورگاندارعا 70-كە تارتا ساراپتامانىڭ قورىتىندىسى جولدانعان.
ولجاس بەكتەنوۆ حابارلاعانداي, ساراپتاماعا تٷسكەن جوبالاردىڭ كٶپتٸگٸنە بايلانىستى ساراپشىلاردى جيناۋ بويىنشا قوسىمشا كونكۋرس جارييالانىپ وتىر. قورىتىندى بەرەتٸن ساراپشىلار جوبا سوڭىنا دەيٸن جەتكەنشە ونى سٷيەمەلدەپ, ونىڭ تالقىلانۋىنا قاتىسىپ, ٶزٸنٸڭ كٶزقاراسىن دەلەلدەي بٸلۋٸ تيٸس. مەملەكەت باسشىسىنىڭ تاپسىرماسىمەن ساراپشىلاردىڭ بارلىق قورىتىندىسى اشىق تالقىلاۋ ٷشٸن جارييالانعان.
