Atyraý oblysynyń ákimi Nurlan Noǵaev ftiziatr-dárigerlerdiń sanyn kóbeitý úshin olardy baspanamen qamtamasyz etý máselesin sheshpek, dep habarlaidy Sputnik Qazaqstan tilshisi.
"Týberkýlezben aýyrý kórsetkishin tómendetý úshin, eń áýeli naýqastar dárigerdiń bergen nusqaýlaryn qatań saqtaýy kerek. Qazirgi kezde, ókinishke qarai, jazylǵan dárilerdi, protsedýralardy ýaqytynda almaý kesirinen bul aýrý órship tur. Ótken aptada biz respýblikanyń bas ftiziatry, týberkýlez máseleleri jónindegi institýt basshysynyń qatysýymen úlken jinalys ótkizdik. Sol jiynda týberkýlezben kúreske qatysty birqatar shara bekitildi. Institýt direktory aitqandai, bizde qazir dárigerlerdiń ózderi bul aýrý túrinen qorqady. "Týberkýlez – qaýipti aýrý" dei bergenimizdiń saldarynan bolashaq dárigerler osy mamandyqqa barýǵa júreksinedi eken. Sondyqtan ftiziatr-dárigerlerin daiyndaý máselesi óte ózekti", — dedi ákim OKQ-de ótken baspasóz máslihatynda.
Noǵaevtyń aitýynsha, byltyr oblysqa 126 dáriger shaqyrylǵan, olardyń 75-i joǵary oqý ornyn endi bitirgender eken. Al kadr tapshylyǵy 240 adamdy qurapty. Biyl taǵy 100-ge jýyq dáriger shaqyrý josparlanyp otyr.
"Atalǵan jumys osyndai qarqynmen júrgizilse, biz ftiziatr-dárigerler tapshylyǵyn jýyq arada joiamyz. Eń aldymen, dárigerlerge úi berý, olardyń áleýmettik máselelerin sheshý qajet", — dedi oblys basshysy.
