Atyraý oblysynyń ákimi Nurlan Noǵaev oblystyq perinataldy ortalyqtaǵy sábi ólimine qatysty Úkimet otyrysynyń úzilisi kezinde pikir bildirdi, dep habarlaidy "Ult aqparat" Atyraý oblysy óńirlik kommýnikatsiialar qyzmetine silteme jasap.
Jýrnalister saýalyna jaýap bergen Nurlan Noǵaev tergeýdiń aiaqtalýyn kútip, istiń aq-qarasy anyqtalǵansha qorytyndy jasamaýdy ótindi.
«Resmi organdar resmi pikir bildirdi. Qazir tergeý sharalary júrgizilýde. Sonyń aiaqtalǵanyn kútý kerek. Ministr óz pikirin bildirdi, vitse-premer de keldi. Tergeý qorytyndysy shyqpai turyp biz baǵa bere almaimyz, - dedi ákim. – Bul máseleniń barlyq túiitkilderin muqiiat tekserý kerek. Birinshiden, tergeý ǵana barlyq saýaldardyń jaýabyn taba alady. Dúniege kelgen sábilerdiń 80 paiyzyna jýyǵy ońaltý bólimine túsedi, salmaǵy óte az, kúni jetpegen. Bul baǵyttaǵy jumysymyzǵa búge-shúgesine deiin toqtalmai-aq qoiaiyn, aitaiyn degenim, sábi ólimi jáne ana men bala kútimi basty nazarda bolmaq. Bul baǵytta úlken jumystar atqarylýda. Ótken jylǵy kórsetkishterdi biylǵymen salystyratyn bolsaq, tómendeý baiqalady. Biraq áldebir sebeptermen tamyz aiynda qaitadan sábi ólimi órship ketti. Tamyzda - 26, qyrkúiekte - 17 sábi shetinegen. Tiisti sharalardy qolǵa alamyz. Bosanatyn 75 áieldi qalalyq perzenthana men ózge de aýrýhanalarǵa kóshirdik. Bul keńesti tergeý barysynda arnaiy komissiia bergen bolatyn. Densaýlyq saqtaý ministrliginiń komissiiasy, ózge de organdardyń toptary qyzmet atqarýda. Júieli jumys júrip jatyr. Ana men bala ómiri - baǵa jetpes bailyǵymyz, sábi ólimi - biz úshin tragediia».
Nurlan Noǵaev oblystyq densaýlyq saqtaý basqarmasy basshysynyń jaýapkershiligi týraly jýrnalister saýalyna:
«Basqarma basshysy qyzmetinen ketý jóninde aryz jazdy, qazir másele qaralý ústinde», - dep jaýap qatty ákim.
Aita keteiik, 2019 jyly óńirge 123 dáriger kelip, onyń ishinde 54 maman perzenthana men ózge de balalar uiymdaryna jiberilgen (13 akýsher-ginekolog, anesteziolog-reanimatolog, 3 neonatolog, 19 bala dárigeri, 14 terapevt), onyń ishinde 12 maman oblystyq perinataldyq ortalyqqa joldanǵan bolatyn.
Oblys ákimi rezidentýraǵa - 48 grant, onyń ishinde 27 grantty perzenthanalar men balalar uiymdaryna bóldi. Bul - granttardyń 56 paiyzy (9 akýsher-ginekolog, 4 neonatolog, 5 anesteziolog-reanimatolog, 5 infektsionist, 1 balalar nevrology, 1 balalar dárigeri).
Eske sala ketsek, Atyraý oblysy perinataldy ortalyǵynyń basshysy men dárigeri jańa týǵan náresteni tońazytqysh kamerasyna salyp óltirdi degen kúdikke ilingen bolatyn.
