Memleket basshysy Qasym-Jomart Toqaev Nurlan Noǵaevty Qazaqstannyń energetika ministri qyzmetine taǵaiyndaý týraly Jarlyqqa qol qoidy.
"Nurlan Asqaruly Noǵaev Qazaqstan Respýblikasynyń Energetika ministri bolyp taǵaiyndalsyn, ol Atyraý oblysynyń ákimi qyzmetinen bosatylsyn", - dep jazylǵan Aqordanyń baspasóz qyzmeti jariialaǵan Jarlyqta.
Esterińizge sala keteiik, búgin Energetika ministrliginiń burynǵy basshysy Qanat Bozymbaev "densaýlyǵyna bailanysty" qyzmetinen bosatylyp, Prezidenttiń Keńesshisi bolyp taǵaiyndaldy.
Noǵaev Nurlan Asqaruly 1967 jyly týǵan. Bilimi joǵary, I.Gýbkin atyndaǵy Máskeý memlekettik munai jáne gaz akademiiasyn, Qazaq memlekettik basqarý akademiiasyn, Resei Syrtqy ister ministrligi janyndaǵy «Halyqaralyq qatynastar ýniversiteti» Máskeý memlekettik institýtyn taý-ken injeneri, ekonomist, halyqaralyq qatynastar mamany, ákimshilik iskerlik jónindegi sheber mamandyqtary boiynsha bitirip shyqqan.
Eńbek jolyn Aqtóbe oblysy, Qandyaǵash stantsiiasynda elektr sheberi bolyp bastaǵan.
1993–1995 j.j. — Máskeý qalasyndaǵy «Gili–Pasker» JShS-de munai ónimderi jónindegi aǵa sarapshy, bólim bastyǵy, bas direktor.
1995–1996 j.j. — Almaty qalasyndaǵy «Otrar Ltd» shaǵyn kásiporny bas direktorynyń orynbasary.
1996–2006 j.j. — «Qazaqtúrikmunai» JShS-de injener, bas direktor.
2006 jyldyń aqpan aiynan tamyz aiyna deiin — «QazMunaiGaz Ulttyq kompaniiasy» AQ-nyń atqarýshy direktory.
2006 jyldyń tamyz aiynan QR Energetika jáne mineraldy resýrstar ministrligi munai ónerkásibi departamentiniń direktory bolyp istegen.
2007 jyldyń qyrkúieginen 2010 jyldyń sáýir aiyna deiin — Batys Qazaqstan oblysy ákiminiń orynbasary.
2010 jyldyń sáýir aiynan 2012 jyldyń qańtaryna deiin oblys ákiminiń birinshi orynbasary.
2012 jyldyń 20 qańtarynda Memleket Basshysynyń Jarlyǵymen Batys Qazaqstan oblysynyń ákimi bolyp taǵaiyndaldy.
2016 jyldyń 26 naýryzynan Atyraý oblysynyń ákimi.
2010 jyly «Qurmet» ordenimen marapattalǵan.
