Mańǵystaý oblysynyń ákimi Nurlan Noǵaev óńirdegi halyqty eńbekpen qamtý máselesine qatysty túsinik berdi, dep habarlaidy QazAqparat.
«Iá, óńirde jumyssyzdyq máselesiniń bary ras. Biraq, másele memlekettik baǵdarlamalardyń aiasynda sheshimin taýyp jatyr. Sol siiaqty barlyq mańǵystaýlyqtardy nemese jańaózendikterdi munai-gaz salasyna jumysqa kirgizý múmkin emes. Kezinde oblys ákimdigi, «QazMunaiGaz» AQ jáne jergilikti munai-gaz óńdeý kompaniialarymen birlesip bos jumys ornyna qabyldaýdyń algoritmi ázirlenip, qabyldandy. Ýaqyt óte kele ol algoritm óziniń tiimdiligin kórsetti. Biz sol baǵyttaǵy jumysty jalǵastyratyn bolamyz», - dedi Nurlan Noǵaev onlain ótken baspasóz máslihatynda.
Sondai-aq, oblys basshysy óńirde jumysqa ornalasý boiynsha problemanyń baryn aitty.
«Keide bos jumysqa ornalasý ashyq túrde ótpei jatady. Nemese jaýapty tulǵalardyń qyzmetin asyra siltep paidalanyp jatatyn sátter de bar. Sondyqtan biz joǵaryda atalǵan jumysqa turý algoritmin qaita qarap, máseleni nazarda ustaimyz. Solaisha jumysqa ornalasýda ashyqtyqty qamtamasyz etpekpiz», - deidi ol.
Mańǵystaý ákiminiń aitýynsha, aldymen eńbekpen qamtý ortalyǵynda resmi tirkelgen azamattar jumyspen qamtylady.
