Foto: Mańǵystaý oblysy ákimdiginiń baspasóz qyzmeti
Mańǵystaý oblysynyń ákimi Nurlan Noǵaev óńir turǵyndaryna úndeý jasady. Ol oblys jurtshylyǵyn tynyshtyq saqtaýǵa, jaǵdaidyń turaqsyzdyǵyna jol bermeýge shaqyrdy, dep habarlaidy "Ult aqparat" aimaq basshysynyń baspasóz qyzmetine silteme jasap.
“Qurmetti mańǵystaýlyqtar! Qadirli jerlester!
Bul jaǵdaidyń barshamyzdyń kóńilimizge qaiaý túsirip otyrǵany jasyryn emes. Osy sátte biz ashý ústinde asyǵys sheshim qabyldamai, sabyr saqtaǵanymyz jón. Biz kez-kelgen túitkildi másele men qiyndyqtardy aqylmen sheship, abyroimen alyp kelemiz. Qoǵamdaǵy shielenisti odan ári ýshyqtyrý, zań men quqyqtyq normalardy buzý jaǵdaidyń turaqsyzdanýyna ákeledi, máseleni sheshpeidi.
Ardaqty aǵaiyn! Barshańyzdy sabyr saqtap, el tynyshtyǵyn buzbaýǵa shaqyramyn!
Biz bul jaǵdaidyń tek zań sheńberinde ádil sheshilgenin qalaimyz. Barshamyzdyń maqsatymyz bir - erteńgi kúnge degen senimdilik pen eldiń amandyǵy, jurttyń tynyshtyǵy. Qazir ásirese arandatýshylarǵa erip ketpei, olardyń el ishine iritki salyp, tynyshtyqty buzýyna jol bermeýimiz qajet.
Bárimizdiń maqsatymyz bir. Halqymyz adal eńbek etip, atqarǵan jumysyna sai eńbekaqysyn alyp, erteńine senimmen qarap, syilastyqta ómir súrýdi qalaimyz jáne ony júzege asyrý úshin jumystanýdamyz. Kásiporyndarda tynyshtyq pen turaqtylyqtyń bolǵany bárimiz úshin de tiimdi.
Qadirli aǵaiyn! Qazir Qasietti Ramazan aiy – meiirim men rýhani tazarý aiy. Biz Sizdermen osyǵan deiin birlesken kúsh-jigerimizdiń arqasynda talai syn-saǵattardan óttik oǵan tarih kýá. Bul túitkildi de aýyzbirshilikpen, yntymaqpen eńseremiz dep senemin.
Halqymyz tynysh, el irgesi – bútin bolsyn!” - dedi óńir basshysy.
Aita keteiik, turaqty jumys talap etip, Astanadaǵy Energetika ministrligi ǵimaratynyń aldynda narazylyq bildirgen jańaózendik munaishylardy 11 sáýirde keshkisin politsiia men arnaiy jasaq kúshtep ustap áketti.
Keiin "BerÁli Mańǵystaý Company" kásiporny jumysshylarynyń ókilderi Jolmurat Ulyqpanov pen Nursultan Nurymuly úndeý jasap, Jańaózendegi qoldaýshylaryn zańsyz áreketke barmaýǵa jáne úilerine qaitýǵa shaqyrdy.
