Energetika ministri Nurlan Noǵaev el aldyndaǵy eseptik kezdesýin qorytyndylaǵan brifingide Qaraǵandy men Aqmola oblystaryn gazdandyrý jumystarynyń keshigý sebebin atady, dep habarlaidy QazAqparat.
«Adamdar gazdy Nur-Sultan qalasy men Aqmola, Qaraǵandy oblystary ákimdikteriniń kestesi boiynsha alyp jatyr. Jekelep aitsaq, Nur-Sultan qalasy ákimdiginiń aqparaty boiynsha astanany gazdandyrý jumystary úsh kezeńge josparlanǵan. Áýeli №1 jáne №2 jylý-elektr ortalyqtaryn gazǵa aýystyrý, Kóktal-1, Kóktal-2, Temirjolshylar shaǵyn aýdandaryn gazdandyrý kózdelgen. Qazir atalǵan jumystar júrgizilip jatyr. Bul – kóp jumysty qajet etetin sharýa», -dedi vedomstvo basshysy.
Ministrdiń sózine qaraǵanda, astanaǵa irgeles eldi mekenderdiń gazdandyrý jumystary kestege sai júrip jatyr. Al kórshi óńirlerdi gazdandyrý jumysynyń keshigýine uiymdastyrý jumystary túrtki bolsa kerek.
«Qaraǵandy oblysy boiynsha aitsaq, búgingi tańda Temirtaý jáne Jezqazǵan qalalaryn gazdandyrý jumystary júrip jatyr. Árine, Qaraǵandynyń ózine de gaz tartylady. Aqmola oblysyndaǵy jumystardyń keshigýine jobalaý-smetalyq qujattardyń ázirligi men merdiger tańdaý máselesi sebepker boldy. Qazir olar da qarqyn aldy. Astanany, Qaraǵandy jáne Aqmola oblystarynyń eldi mekenderin gazdandyrý Energetika ministrligi maquldap bekitken kestege sai júrip jatyr. Energetika ministrligi óziniń mindettemelir aiasynda barlyq jumystardy atqardy. «Saryarqa» gaz magistrali tartyldy. Qazir ákimdikter jumysty ári qarai jalǵastyrýda. Men buny óte aýqymdy joba dep esepteimin. Onyń tolyq iske asýyna ýaqyt kerek. Onyń ústine ómir óz túzetýlerin engizip jatyr», - dedi Nurlan Noǵaev.
