Búgin Májiliste «Memlekettik tildiń latyn grafikasyndaǵy álipbiiniń biryńǵai standartyn engizý máseleleri týraly» parlamenttik tyńdaý ótti, dep habarlaidy "Ult aqparat" QR Parlamenti Májilisi baspasóz qyzmetine silteme jasap.
Memlekettik tildi jańǵyrtý qajettiligin, onyń ishinde latyn grafikasyna ótý týraly Memleket basshysy N.Á. Nazarbaev «Qazaqstan – 2050 strategiiasy qalyptasqan memlekettiń jańa saiasi baǵyty» atty Qazaqstan halqyna joldaýynda atap ótken bolatyn.
Parlamenttik tyńdaýda Májilis Tóraǵasy N. Nyǵmatýlin: «Bizdiń ulttyq sana-sezim, rýhani damý, órkendeý jolymyz, osynyń barlyǵy, qazaq tiliniń jańa álipbiin jasaýdan bastalady. Sebebi, Elbasymyz Nursultan Ábishuly Nazarbaev aitqandai, qazaq tili – ol bizdiń rýhani negizimiz. Osy jolda tildiń halyqaralyq mártebesin kóterý, bizdiń álemdik órkenietke jetýimizdiń basty kepili. Sonymen birge, jańa álipbi búkil álem qazaqtaryn biriktiretin óte mańyzdy faktor» - dedi.
Osy rette Palata spikeri til jáne jańa álipbi máselesinde qatelikke jol berýge bolmaitynyna, qazaq tilin jańǵyrtýdyń basty kórsetkishi latyn jazýyna kóshý ekendigine jáne álem qazaqtaryn biriktiretin mańyzdy faktor ekenine toqtaldy.
Otyrys barysynda halyq qalaýlylary men belgili saiasatkerler, ziialy qaýym ókilderi, ǵalymdar, sarapshylar men til mamandary, qoǵamdyq uiym músheleri jańa álipbidiń jobasyn ázirlegen mamandardyń eńbekterimen tanysty.
