Búgin Parlament Májilisiniń Spikeri Nurlan Nyǵmatýlinniń tóraǵalyǵymen ótken Palatanyń jalpy otyrysynda depýtattar «Qazaqstan Respýblikasy Táýelsizdiginiń jiyrma bes jyldyǵyna bailanysty raqymshylyq jasaý týraly» zań jobasyn maquldady, dep habarlaily "Ult aqparat" QR Parlamenti Májilisi apparatynyń baspasóz qyzmetine silteme jasap.
Májilis Tóraǵasy Nurlan Nyǵmatýlin: - Bul zań jobasy tikelei Elbasymyz Nursultan Ábishuly Nazarbaevtyń bastamasymen alǵashqy ret engizildi. Osy oraida, Prezidentimiz qatelik jasaǵan azamattarǵa keshirim jasap, olardyń jańa ómir bastaýyna jol ashyp otyr. Bul táýelsiz elimizdiń shyn máninde demokratiialyq jáne órkenietti el bolýynyń naqty kórsetkishi,-dep atap ótti.
Zań jobasynda azamattardyń áleýmettik osal sanattary – kámeletke tolmaǵandarǵa, júkti áielderge, kámeletke tolmaǵan balalary nemese múgedek balalary bar áielderge, sondai-aq kámeletke tolmaǵan balalardyń jalǵyz ata-anasy bolyp tabylatyn er adamdarǵa, I, II jáne III toptaǵy múgedekterge, elý jastaǵy jáne ol jastan asqan áielderge, alpys jastaǵy jáne ol jastan asqan er adamdarǵa, Uly Otan soǵysynyń qatysýshylary men múgedekterine jáne olarǵa teńestirilgen adamdarǵa, áskeri jáne internatsionaldyq boryshyn oryndaý kezinde qaza tapqan áskeri qyzmetshilerdiń jesirlerine, sondai-aq kúieýleri soǵys múgedekteri jáne olarǵa teńestirilgen adamdar bolyp tabylatyn áielderge qatysty raqymshylyq jasaý uiǵarylyp otyr.
Barlyq qylmystyq ister men sottar qaramaǵan ister boiynsha, qylmystyq teris qylyqtar men onsha aýyr emes qylmystar boiynsha is júrgizýdi toqtatý kózdelip otyr. Sottalǵan adamdardyń jekelegen sanattary úshin jaza merziminiń ótelmegen bóligin aiyppulmen nemese bas bostandyǵyn shekteýmen aýystyrý nemese ony qysqartý rásimin qoldaný múmkindigi paida bolady.
Sonymen qatar, zań jobasynda raqymshylyq jasaý aktisi qoldanylmaityn adamdardyń aiasy belgilenedi. Bul jynystyq tiispeýshilikke qarsy qylmystar; terroristik jáne ekstremistik qylmystar; azaptaýlar jasaǵan adamdar; retsidivister; ómir boiyna bas bostandyǵynan aiyrýǵa jazalanǵan, sondai-aq keshirim jasaý tártibimen ólim jazasy bas bostandyǵynan aiyrýǵa aýystyrylǵan adamdar, buryn raqymshylyq jasalǵan nemese keshirim jasalǵan jáne qaitadan qasaqana qylmystar jasaǵan adamdar; qylmystyq toptar quramynda qylmystar jasaǵany úshin sottalǵan, sondai-aq qylmystyq zańda belgilengen birqatar ózge de qylmystar jasaǵan adamdar.
