"Resei Ýkrainaǵa qater tóndirip tur deidi. Bos sóz. Eshqandai qater joq", – degen Patrýshev, "ýkrainalyqtardyń ózi, sonyń ishinde resmi tulǵalary da qater joq dep otyrǵanyn" atap ótti.
"Joq, amerikanyń resmi adamdary qater bar dep esepteidi eken, olar Ýkrainaǵa qarý berip, Ýkrainanyń sońǵy azamaty qalǵansha shaiqasýǵa daiyn eken", – dedi Resei qaýipsizdik keńesiniń hatshysy.
Onyń sózinshe "soǵyssa eki taraptyń qanshalyqty zardap shegetininde amerikalyqtardyń sharýasy joq".
28 qańtarda AQSh memleket hatshysy Entoni Blinken Máskeýdi Resei men Ýkraina jáne Batys arasyndaǵy arazdyqty diplomatiialyq tásilge júginip toqtatýǵa shaqyrǵan.
27 qańtarda Azattyqqa bergen suqbatynda Blinken "Vashington Kremldiń Ýkraina jónindegi túpki maqsaty men Eýropadaǵy qaýipsizdik qurylymyn qaita jazýdy ne sebepten talap etip otyrǵanyn áli kúnge bilmeitinin aitqan edi.
"Kremldiń neni qalaitynyn biletin bir-aq adam bar. Ol - prezident Pýtin. Bálkim, dál qazir ol da bilmeýi múmkin, óitkeni bul - onyń burynǵy tásili, - ol ári qarai qalai áreket etýdiń meilinshe alýan túrli nusqalaryn qarastyrady", - dep málimdedi Blinken.
AQSh-tyń joǵary laýazymdy diplomaty Qurama Shtattar Reseidiń ótken aida qoiǵan ýltimatýmyna resmi túrde jaýap bergen kúnniń erteńine sóilep otyr.
Ýltimatýmǵa uqsas eki joba usynǵan Resei Ýkrainamen shekarasyna 100 myń áskerin ákep qoiǵan.
