Beisenbi kúni Nigeriia Densaýlyq saqtaý federaldyq ministrligi Twitter-de elde Lagos shtatynda bir adamnyń koronavirýs juqtyrǵanyn málim etti, dep habarlaidy CBS News.
Virýs Nigeriiada jumys isteitin Italiia azamatynan tabylǵan. Ol 25 aqpanda Milannan kelgen. Qazirgi ýaqytta naýqas Lagos aýrýhanasynda jatyr. Nigeriia koronavirýs infektsiiasy tabylǵan Afrikadaǵy alǵashqy memleket.
Sondai-aq, virýs jeksenbi kúni Italiiadan kelgen Izrail azamatynan da tabyldy, dep jazady Jerusalem Post. Naýqastyń qyzýy kóterilip, karantinge jatqyzylǵan, dep habarlady eldiń densaýlyq saqtaý ministrligi. Bul adammen bailanysqandardyń barlyǵy úilerinde karantinde jatyr.
Er adam El Al áýe kompaniiasynyń 382 reisimen Italiiadan Izrailge jeksenbi kúni ushyp keldi.
Budan buryn Izrail aýmaǵynda koronavirýs infektsiiasy eki adamnan tabyldy. Olar Diamond Princess krýizdik laineriniń jolaýshylary bolǵan.
Eldiń ishki ister ministri Are Deri beisenbi kúni koronavirýsqa bailanysty italiialyq týristerdiń Izrail aýmaǵyna kirýine tyiym salatyn qujatqa qol qoiatynyn aitqan edi. Beisenbi kúni Italiiadan kelgen birneshe sheteldik týristke elge kirýge ruqsat etilmedi. Bergamodan ushyp kelgen 25 týrist (sonyń ishinde 19 italiialyq) ushaqtyń bortynda qaldy.
Sársenbi kúni densaýlyq saqtaý ministrligi Italiiadan kelgen barlyq Izrail azamattarynyń úilerinde 14 kún boiy karantinde bolýy tiis ekenin eskertti.
Eske salaiyq, Italiiada virýstan 17 adam kóz jumdy, aýrý juqtyrǵandar sany 650 adamǵa jetti.
