Masqara!
Órtenip óldi bes bala,
O, sumdyq, netken masqara!
Jylamas buǵan jádigói,
Jibimes buǵan tas qana.
Qara tún aldy – keshki ińir,
Ińirden zaýal esti bir.
Shybyndap bizder júrgende,
Shyryldap ketti bes ǵumyr.
Saraidan sarai salamyz,
Ne qylǵan soqyr sanamyz?
Ókirip jatyr ata-ana,
Órtenip jatyr balamyz.
Daýasyz sorǵa soqtyqqan,
Osynyń bári – joqtyqtan.
Semirip alǵan kóp serke,
Sekirip júr ǵoi toqtyqtan.
Qýdala, meili shetke qaq,
Jańqalap, jaryp otqa jaq!
Qai qýys, qaida barsań da,
Qańǵyryp júrgen kóp qazaq.
Joqshylyq qana – úlesi,
Halqymnyń kórgen kúni osy!
Qashanǵa deiin jalǵasar,
Bai menen kedei kúresi?
Qańǵyryp júrip páterde,
Uryndy qaýsap qaterge.
Baiqustyń munda úii joq,
Úii joq jáne shetelde...
Boiyna aram boq singen,
Shesheýnik qansha tepsingen.
Ministr ketsin ornynan,
On alty myńdy kópsingen!
Jelkildep ósip jetpei me,
Balasyz ómir kóktei me?
Órtenip urpaq ólgenshe,
Órtenip dúnie ketpei me?!.
Nesipbek Aituly,
Memlekettik syilyqtyń laýreaty
