Qazaqstan kommýnistik halyq partiiasy halyqqa nesie raqymshylyǵyn jasaý bastamasyna bailanysty elordada otyrys ótkizdi, dep habarlaidy "Ult aqparat".
«Keshe ózderińiz biletindei, biz halyqtyń, shaǵyn jáne orta biznestiń nesiege batyp ketkenin aityp, Úkimetke saýal hat joldaǵan edik. Biz jalpy halyqpen etene jumys júrgizemiz. Kóbiniń máselesinen habarymyz bar. Azamattardyń kóbi nesie júktemesine bailanysty qinalatynyn aitady. Sebebi halyqtyń ishinde 4-5 bankte qaryzy bar azamattar bar. Olardy óteý tym qiyn. Halyqtyń kóbi osyndai tyǵyryqta tur», - deidi QKHP OK hatshysy, QR Parlamentindegi atalmysh partiia fraktsiiasynyń jetekshisi Aiqyn Qońyrov QKHP Nur-Sultan qalalyq komitetiniń keńsesinde ótken otyrysta.
Onyń aitýynsha, qazirgi zańnamaǵa sáikes azamattardyń alǵan qaryzy úshin bankter men mikroqarjylyq uiymdardyń aldyndaǵy jaýapkershiligi kúsheigen. Qarjylyq institýttar qaitarylmaǵan qaryzdar úshin azamattardyń quqyǵyn shektei alady.
«Keibir qarjylyq institýttar azamattardyń el ishinde qozǵalysyn shekteýge deiingi quzyretke ie bolǵan. Tipti poiyz ben ushaqqa otyrǵyzbaýǵa deiingi jaǵdailar kezdesedi. Munyń aqyry ekonomikany degradatsiiaǵa ushyratynyn eskerý kerek», - dedi ol.
Aiqyn Qońyrovtyń sózine sensek bank sektorynyń ekonomikanyń shynaiy sektoryndaǵy kúshi basym.
«Ekonomisterdiń aitýynsha, bul jaǵdai qazir óziniń logikalyq túiinine taqap qalǵan. Ótken ǵasyrda Batys elderiniń bankirleri men kapitalisteri ekonomikanyń basym bóliginiń nesiege batý máselesimen betpe-bet kelgen. Alaida keiin sovet biligi qulap qaldy da, jańa naryqtarǵa jol ashyldy. Tiisinshe olar bul júieni jalǵastyrý múmkindigine ie boldy. Biraq bizdegi jaǵdaidy oilaiyq. Qazir Qazaqstan halqynyń 90 paiyzynda nesie bar. Qazir kóp adamda endi nesie alatyn jaǵdai da joq. Sebebi jańadan qaryz alý úshin eskisin jabýyń kerek. Al eski nesieni jabý úshin tabysyń bolýy tiis. Al devalvatsiiaǵa bailanysty halyqtyń tabysy túsip ketti. Sol sebepti halyqta ony jabar shama da joq», - deidi ol.
Eske sala ketsek keshe Májilistiń jalpy otyrysynda «Halyq kommýnisteri» fraktsiiasynyń depýtattary atynan Úkimet basshysy Asqar Maminge saýal joldaǵan bolatyn.
Olardyń aitýynsha elde shekteý sharalary engizilgenge deiin turaqty túrde salyq tólegenimen, qazir obektivti sebepterge bailanysty nesielerge qyzmet kórsetý boiynsha kúrdeli jaǵdaiǵa tap bolǵan jeke jáne zańdy tulǵalar úshin keń aýqymdy nesie raqymshylyǵyn júrgizý qajet.
