Aiyrtaý aýdany, Soltústik Qazaqstan oblysynda jańa zaýyt iske qosyldy. Sýblimatsiialanǵan bie sútin óndiretin kásiporyn jyl saiyn 40 tonnaǵa deiin ónim shyǵarýǵa daiyn.
Óndiris protsesi saýmaldy –55 °C temperatýrada muzdatýdy jáne keiin ylǵalyn tolyq alyp tastaýdy kózdeidi. Bul ónimniń tabiǵi quramyn — albýmindi aqýyzdar, immýnoglobýlinder, dárýmender, fermentter men poliqanyqpaǵan mai qyshqyldaryn — saqtaýǵa jáne onyń saqtaý merzimin eki jylǵa deiin ulǵaitýǵa múmkindik beredi.
Tereń sýblimatsiia tehnologiiasyn nemis fermeri jáne kásipkeri Gans Tsolman ázirlegen. Onyń kompaniiasy Germaniiada kóp jyldan beri qymyz óndirýmen ainalysady.
Soltústik Qazaqstan oblysyndaǵy óndiris «Sever Agro LTD» kompaniiasyna tiesili ferma bazasynda uiymdastyryldy. Munda bielerdi kútip-baǵýǵa jáne saýýǵa arnalǵan alańdar, sondai-aq sýblimatsiialyq keptirý jelileri bar tseh ashyldy. Bul 30 jumys ornynyń qurylýyna múmkindik berdi. «Sever Agro LTD» JShS direktory Erbýlat Kalenovtyń aitýynsha, kásiporyn óńirdegi aýylsharýashylyq shikizatyn qaita óńdeýdi damytýǵa jol ashady.
«Biz ónimdi ishki naryqqa da, sondai-aq Qytai men Eýropa elderine eksportqa da baǵyttap otyrmyz. Zaýyt óńdelgen ónimder túrin keńeitýge jáne óńirdiń agroónerkásiptik sektordaǵy pozitsiiasyn nyǵaitýǵa múmkindik beredi».
Joba agroónerkásiptik keshendi nesieleýdiń memlekettik baǵdarlamasy aiasynda júzege asyryldy. Investitsiia kólemi úsh milliard teńgeden asty.
