Egistikke rizashylyq bildirýge baǵyttalǵan meiramdardyń barlyǵy derlik aýylsharýashylyq jumystary aiaqtalǵan merzim, iaǵni qazan aiynda toilanatyny belgili. Olardyń keibiri belgili bir aimaqtarda ǵana atalyp ótse, endi birin nemis halqynyń barlyǵy atap ótedi. Egistikke rizashylyq bildirý merekesi «Erntedankfest» te osy sanatqa kiredi. Bul – alǵys aitý kúni.
Ádette atalǵan merekeni aýa-raiynyń qolaily bolyp, eginniń kóptep shyqqany men ótken jyly oryn alǵan jaǵymdy oqiǵalar úshin Táńirge rizashylyq bildirý maqsatynda sán-saltanatty túrde ótkizedi.
Jambyl oblysynda turatyn nemis halqy da bul merekeni eleýsiz qaldyrmady. Dálirek aitsaq, 2017 jyldyń 29 qazany kúni Dostyq úiinde Jambyl oblystyq nemister qoǵamy oblys ákimi apparatynyń «Qoǵamdyq kelisim» KMM qoldaýymen «Erntedankfest»-ke orai, nemis etnosynyń mádenieti kúnin ótkizdi. Uiymdastyrýshylar osy is-shara arqyly kórermendi egistikke rizashylyq bildirýdiń mánimen, nemis halqynyń ádet-ǵurpymen tanystyryp, sahnadaǵy qoiylymdarǵa tartýdy kózdedi.
Merekelik is-shara jan-jaqty oilastyrylyp, úlken bir miýzikl syndy uiymdastyrylǵan eken. Teatrlandyrylǵan qoiylymdardan bólek, onda orys jáne nemis tilderinde ánder aitylyp, bi bilendi. Nemis polkasynsyz eshqandai mereke ótpeidi emes pe?! Al is-sharanyń sánin kirgizgen - kishkentai búldirshinder. Jemis-jidek, kókónis kostiýmderin kigen olar óleń oqyp, án aityp, oiynshyq atqa minip bi de biledi.
Jambyl oblystyq nemister qoǵamynyń tóraǵasy Aleksandr Gibner men direktory Nikolai Fast óz sózderinde qazirgi tańda jergilikti halyq «Erntedankfest»-ti qalai atap ótetinine toqtalyp, jiylǵan qaýymǵa shyn júrekten izgi tilekterin bildirdi: «Astyq merekesi kóbinese aýyldarda bar sán-salatanatymen toilanady, alaida qala halqy da bul meiramdy atap ótkendi unatatynyn baiqaimyz. Ádette olar shirkeýge barady, keiin as daiyndap, otbasynyń barlyq múshelerin bir dastarhan basyna jinaýdy ádetke ainaldyrǵan. Qalanyń ortalyq alańynda olar kontsertter tamashalap, jármeńkelerge qatysyp, jaqsylap atap ótedi. Al biz óz kezegimizde sizderge jáne sizderdiń otbasylaryńyzǵa densaýlyq, baq-bereke jáne mol astyq tileimiz!»
.jpeg)