Qazaqstannyń eńbek sińirgen qairatkeri, ánshi Sáken Maiǵaziev jaqynda ata atanǵanyn aityp, otbasyndaǵy erekshe dástúrmen bólisti, dep habarlaidy ult.kz."Tańsholpan" baǵdarlamasyna qonaq bolǵan óner iesi nemere súiýdiń ózindik erekshe sezim ekenin jetkizdi.
Sondai-aq ol bala tárbiesinde ata-ájeniń orny mańyzdy ekenin atap ótti.
" Ata-áje baqqan balanyń jaman bolǵanyn kórmedim. Jumys bolsyn, kópshilik jer bolsyn árqashan alda júredi. Ádet-ǵurypty, dástúrdi boiyna sińirip ósed", - dedi ánshi.
Sonymen qatar ol sábidiń besikte jatyp besik jyryn estip jetilýinde de ózindik mán baryn atap ótti.
"Adal jarym Dinara Asylhanqyzy da osy jaiynda óte kóp taldaýlar jasap júr. Psihologiialyq turǵyda qandai paidasy baryn kópshilikke túsindirýde. Nemerem de besikte jatady. Ol marqum ákemniń besigi", - dedi.
Sáken Maiǵaziev kim?
Sáken Maiǵaziev – qazaqstandyq ánshi, Qazaqstannyń eńbek sińirgen qairatkeri jáne "MýzART" tobynyń múshesi. 2025 jyly óner iesi 50 jas mereitoiyn atap ótti. Ol Túrkistan óńiriniń týmasy. Sáken Maiǵaziev kásibi mýzykalyq bilimin Júsipbek Elebekov atyndaǵy Respýblikalyq estrada jáne tsirk kolledjinde alǵan. 1993 jyly atalǵan oqý ornyna túsip, soqpaly aspaptar jáne estradalyq vokal mamandyǵy boiynsha bilim aldy. 1997 jyly Temirbek Júrgenov atyndaǵy Qazaq ulttyq óner akademiiasynda oqýyn jalǵastyrdy. Ánshiniń ónerdegi alǵashqy jetistikteriniń biri 1996 jyly Tarazda ótken Shámshi Qaldaiaqov atyndaǵy halyqaralyq festivalmen bailanysty. Ol osy baiqaýdyń diplomanty atandy. 1997 jyly respýblikalyq "Jas qanat" baiqaýynda "Altyn dombyra" júldesin ielendi. 1998 jyly "Almaty – 98" festivalinde birinshi oryn aldy.
2001 jyldan bastap Sáken Maiǵaziev "MýzART" tobynyń quramynda óner kórsete bastady. Keiin bul ujym qazaq estradasyndaǵy tanymal toptardyń birine ainaldy. Sáken Maiǵaziev jeke oryndaýshy retinde de shyǵarmashylyq keshter ótkizip keledi. 2015 jyly onyń "Asyl ana" atty shyǵarmashylyq kontserti ótip, onda repertýaryndaǵy belgili jáne jańa ánderi oryndaldy. Ánshi televiziialyq mýzykalyq jobalarǵa da qatysyp, jas oryndaýshylarǵa tálimgerlik etti. 2021 jyly ol "Qazaqstan daýysy" jobasyndaǵy tórt tálimgerdiń biri boldy. Sonymen qatar ónerdegi tájiribesin keiingi býynǵa jetkizý maqsatynda ustazdyq qyzmetpen ainalysyp, 2012 jyldan bastap ózi bilim alǵan estrada jáne tsirk kolledjinde sabaq berdi. Sáken Maiǵaziev Qazaqstannyń eńbek sińirgen qairatkeri ataǵyna ie jáne "Daryn" memlekettik jastar syilyǵynyń laýreaty.
2025 jyly 50 jyldyq mereitoiyna orai Qazaqstan óńirlerinde kontserttik týr ótkizip, sol jyly óner men mádenietke qosqan úlesi úshin Sozaq aýdanynyń "Qurmetti azamaty" atandy. Osylaisha, Sáken Maiǵaziev – otandyq estradada shirek ǵasyrdan astam ýaqyt boiy óner kórsetip, oryndaýshylyqpen qatar ustazdyq jáne tálimgerlik baǵytta da eńbek etip kele jatqan belgili óner qairatkeri.
