2026 jylǵy 10 mamyrda bastalǵan negizgi Ulttyq biryńǵai testileý (UBT) aiasynda talapkerler 340 myńǵa jýyq test tapsyrdy, dep habarlaidy ult.kz.
Ulttyq testileý ortalyǵynyń málimetinshe, talapkerlerdiń:
- 73%-y testi qazaq tilinde;
- 27%-y orys tilinde;
- 522 adam aǵylshyn tilinde tapsyrǵan.
Jetinshi aptanyń qorytyndysy boiynsha talapkerlerdiń 70%-y shekti balldy eńsergen. Bes pán boiynsha ortasha nátije 66 balldy qurady.
Eń joǵary kórsetkish – 140 balldy Pavlodar oblysynyń túlegi Áset Altair jinady.
UBT-ǵa erekshe bilim berý qajettiligi (EBQ) bar 765 talapker qatysyp, olar úshin arnaiy jaǵdailar jasalǵan.
Talapkerler test tapsyrmalarynyń mazmuny boiynsha emtihan aiaqtalǵannan keiin 30 minýt ishinde apelliatsiiaǵa ótinish bere alady. Al tehnikalyq sebepterge bailanysty apelliatsiialar testileý barysynda qabyldanady.
Apelliatsiialar qaralǵannan keiin sertifikattar talapkerlerdiń jeke kabinetterinde qoljetimdi bolady.
UBT-nyń jeti aptasynda 715 ereje buzýshylyq tirkeldi.
Olardyń ishinde:
- 422 talapker smartfon, smart kózildirik, mikroqulaqqap, shpargalka jáne basqa da tyiym salynǵan zattardy alyp kirmek bolǵany úshin testileýge jiberilmedi;
- 286 talapker testileý kezinde erejeni buzǵany úshin aýditoriiadan shyǵarylyp, nátijeleri joiyldy;
- beinejazbalardy tekserý barysynda taǵy 7 adamnyń nátijesi kúshin joidy.
Biyl basqa adamnyń ornyna test tapsyrý faktileri tirkelmegen.
Ulttyq testileý ortalyǵynyń habarlaýynsha, 2026 jylǵy UBT aiaqtalǵannan keiin 31 qazanǵa deiin beinejazbalarǵa taldaý júrgiziledi. Eger tyiym salynǵan zattardy paidalaný nemese ózge de ereje buzýshylyqtar anyqtalsa, talapkerlerdiń UBT nátijeleri joiylady.
Aita keteiik, biyl negizgi UBT-ǵa qatysý úshin shamamen 240 myń talapker eki múmkindik boiynsha 446 myńnan astam ótinish bergen.
