Memleket basshysy Nursultan Nazarbaev búgingi Parlament palatalarynyń birlesken otyrysynda halyqtyń ál-aýqatyn arttyrý maqsatynda áleýmettik bes bastama usyndy, dep habarlaidy Baq.kz tilshisi.
«Tabysymyzdy eselep, táýelsizdigimizdi baiandy ete túsý úshin bizge baltalasa da buzylmaityn berik aýyzbirshilik kerek. Berekeli birligimizdi kózdiń qarashyǵyndai saqtai alsaq, berekeli tirligimizge tónetin qaýip joq. Muny aityp ótkenim, aýmaly-tókpeli dúnieniń ortasynda júrip jatyrmyz. Ejelden ata-babamyz eki imperiianyń arasynda ómir súrip kele jatyr, halyq neshetúrli qiiametti kórdi. Qazir qubylmaly zaman, qai jaqtan ne bolatynyn eshkim bilmeidi. Sondyqtan judyryqtai jumylǵan rýhy biik halyqty eshkim almaidy. Másele halyqtyń kóptiginde, azdyǵynda emes, másele adamnyń qýattylyǵynda, saýattylyǵynda emes, másele – rýhani birlikte. Jan aiamai "ne táýelsizdik, ne ómir joq" degen qaǵidamen ómir súrýimiz kerek. Jastardy solai tárbielegen jón jáne osy jerde olqylyqtar bar. Qazaqstandaǵy jaqsy men jamannyń bárine el men jerdiń iesi retinde qazaq jaýapty», - dedi Elbasy.
Prezident qazaq halqyna osy uly jaýapkershilikti sezine otyryp, barsha ulystyń uiytqysy bolýǵa, ózgege ónege kórsetýge shaqyrdy.
«Jariialanyp otyrǵan isterdiń bári eldiń qamy, ásirese bolashaqtyń, jastardyń qamy. Bul sharalardy oryndaý úshin aýyzbirshilik pen jiger qajet. Osyny únemi este ustap tyń mindetterdi naqty tabystarǵa ulastyra bereiik. Iske sát», - dedi Nursultan Nazarabev Parlamenttiń qos palatasynyń birlesken otyrysynda.
Memleket basshysy sóz sońynda Parlament pen Úkimetke halyqpen aqyldasa otyryp tiisti jobalardy jasaý úshin iske kirisýdi tapsyrdy. Halyqtyń jaǵdaiyn túzeý úshin álde de mundai jaǵdailar jalǵasa beretinin jáne bul bastamasy ǵana ekenin aita ketti. Sodan keiin birlesken otyrys jabyq dep jariialandy.
