Foto: UOK
Parij Olimpiadasynyń jartylai finalynda qytailyq Ý Iýge ese jibergen Nazym Qyzaibai pikirin bildirdi, dep jazady "Ult aqparat" UOK baspasóz qyzmetine silteme jasap.
"Áielder boksynan qazaqtan shyqqan tuńǵysh Olimpiada chempiony ataný armanym boldy. Dziýdoshy qyzdarmen Parijde jolyqqanda da sony bir birimizge tiledik.
Qazir ózime asa kóńilim tolyp turǵan joq. Óitkeni altyn alǵym keldi jáne jeńýge bolatyn qarsylas edi. Alaida qytai qyzy jekpe jek barysynda aldap ketti. Oǵan qosa mende “qolaǵa jettiń, endi altyn alý kerek” degen júkteme turǵandai boldy. Sol kedergi keltirgendei.
Jeńsem de, jeńilsem de qasymnan tabylatyn otbasyma, dostaryma rahmet aitamyn!
Jeńisimdi maǵan qoldaý kórsetken kópshilikke arnaimyn!", - dedi Nazym Qyzaibai.
Al, Qazaqstan Ulttyq Olimpiadalyq komitetiniń prezidenti Gennadii Golovkin boksshy Nazym Qyzaibaidy Parij Olimpiadasynyń qola júldesimen quttyqtady.
"Nazymdy Olimpiada oiyndarynyń qola medalimen quttyqtaimyn!
Nazym uzaq jyldar boiy elimizdegi áielder boksynyń jarqyn ókili ári komandanyń kóshbasshysy bolyp keledi.
Óziniń alǵashqy Olimpiadasyna qatysqanyna qaramastan, ol álemdegi eń myqty sportshylardyń qatarynan ekenin taǵy bir dáleldedi. Sizdiń bul jetistigińiz kóptegen jas atletke jiger syilap, eńbek pen tózimniń aqtalatynyna shynaiy úlgi bolsyn dep tileimin.
Qazaqstan Ulttyq Olimpiadalyq komitetiniń atynan Nazym men onyń bapkeri Dolkýnjan Kamekovty jáne barsha qazaqstandyqtardy Olimpiada medalimen quttyqtaimyn!", - delingen jedelhatta.
Aita keteiik, Nazym Qyzaibai Bokstan el qorjynyna qola medal saldy.
