Eki dúrkin álem chempiony Nazym Qyzaibai bokstan kishi álem chempionaty sanalatyn "Strandja kýbogy – 2022" halyqaralyq týrniriniń jeńimpazy atandy. Bul týraly Qazaqstan boks federatsiiasy habarlady, dep jazady Sputnik Qazaqstan.
50 kelige deiingi salmaq dárejesindegi finalda Qyzaibaiǵa Aljirden kelgen Roýmaisa Boýal qarsylas boldy.
Qazaqstandyq sportshy úsh raýnd qorytyndysy boiynsha tóreshilerdiń sheshimimen jeńiske jetti.
Úshinshi raýndta Nazym qarsylasyn nokdaýnǵa jibergeni aityldy. Osylaisha Nazym Qyzaibai Qazaqstan quramasy úshin alǵashqy altyn medaldi jeńip aldy.
Qola medalmen týrnirdi Sanjar Tashkenbai, Timýr Qabdeshev, Abzal Quttybekov, Abzal Serik jáne Nurlan Saparbai aiaqtady. 20 aqpanda Sofiiada (Bolgariia) bokstan "Strandja" halyqaralyq týrniri bastaldy. Onda Qazaqstannyń erler quramasynan kóp sportshy qatysty. Biyl týrnirge 36 eldiń boksshylary qatysty. Búgin týrnirdiń sońǵy kúni ótedi.
