«Názir Tórequlov» Halyqaralyq qory, Túrkistandaǵy Tuńǵysh elshi mýzeii jáne «Ádebiet jáne óner» qoǵamdyq birlestiktiń birlesken mádeni baǵdarlamasynyń aiasynda oblys ortalyǵy Túrkistan qalasynan shyqqan saparshylar Ózbekstanǵa, iaǵni Tashkentke, Ferǵana aimaǵyna, Qoqan qalasyna jasaǵan «Názir júrgen jol» atty tarihi, tanymdyq, ǵylymi ekspeditsiiasyn uiymdastyrdy, dep habarlaidy "Ult aqparat".
Ekskýrsiianyń negizgi maqsaty qazaqqa da, ózbekke de birdei ortaq tulǵa, memleket jáne qoǵam qairatkeri Názir Tórequlovtyń jastyq shaǵy, azamat bolyp qalyptasqan kezinde Tashkentte ornalasqan Túrkistan avtonomiialyq respýblikasynyń basshysy bolǵan Názirdiń sol ólkedegi ómirinen, qyzmetinen derekter, aiǵaqtar izdeý bolatyn. Sapar barysynda ekspeditsiia quramy jasaǵan Tashkent, Qoqan ekspeditsiialyq jolynda ózderiniń alǵa qoiǵan maqsattaryna qol jetkizdi.
Ekspeditsiia quramynda «Názir Tórequlov» Halyqaralyq qorynyń prezidenti, Qazaqstannyń eńbek sińirgen qairatkeri, akademik Ábdijapar Saparbaev, názirtanýshy Nurmahan Nazarov, qordyń músheleri Nurlybek Balǵabekov, Áýeshan Mańǵytaiulylar boldy. Ekspeditsiia músheleri Názirdiń Qoqan qalasynda turǵan, oqyǵan, qyzmet jasaǵan oryndarymen, ǵimarattarymen tanysty. Osy saparda ekspeditsiia quramy Qoqandaǵy Názir Tórequlov kóshesiniń turǵyndarymen kezdesip, estelikke sýretke tústi.
Tashkent qalasyndaǵy Ulttyq qazaq mádeni ortalyǵy men Nizami atyndaǵy Ulttyq pedagogikalyq ýniversitetiniń Abai mádeni ortalyǵynda bolyp, qazaq-ózbek professor oqytýshylar quramy jáne stýdentterimen mazmundy kezdesý ótkizdi. Kezdesýde «Názir Tórequlov» atyndaǵy Halyqaralyq qordyń prezidenti, ekonomika ǵylymdarynyń doktory, professor Ábdijapar Saparbaev qazaq pen ózbekke ortaq tulǵa, memleket jáne qoǵam qairatkeri Názir Tórequlov jaiynda tartymdy da, mazmundy baiandama jasady. Osy sharalardyń bárinde Názirdiń týǵan inisi Qadyrdyń nemere jieni, Qoqan qalasynyń turǵyny Eliiar Tórequlov qarsy alyp, alystan izdep kelgen aǵaiyndarǵa iltipat tanytyp, qamqorlyq jasady.
Kezdesýdiń qorytyndy jiynynda Tashkenttegi Ulttyq qazaq mádeni ortalyǵynyń tóraǵasy Hamza Hamraqulov qatysyp, rizashylyǵyn bildirdi.
