QR Bilim jáne ǵylym ministri Ashat Aimaǵambetov 2022 jyly Nazarbayev University úlgisindegi ýniversitetter qai qalalarda ashylatynyn aityp berdi, dep habarlaidy QazAqparat.
«Shynynda da, bizdiń aldymyzda osyndai mindet tur. Eń aldymen, Nazarbayev University tipi boiynsha aldyńǵy qatarly eki joǵary oqý ornyn qurý. Ekinshisi – 20 akademiialyq artyqshylyq ortalyqtaryn qurý. Bul – elimizdiń joǵary bilim berý júiesi úshin óte mańyzdy jobalar. Akademiialyq artyqshylyq ortalyqtary boiynsha jumystar bastaldy. Ortalyqtar jumys istep turǵan JOO-lar bazasynda olardyń áleýetin, materialdyq-tehnikalyq bazasyn nyǵaitý, bilim berý baǵdarlamalaryn jaqsartý, professorlyq-oqytýshylyq quramnyń biliktiligin arttyrý úshin qurylmaq», - dedi ministr Ortalyq kommýnikatsiialar qyzmetinde ótken baspasóz máslihatynda.
Al ozyq joǵary oqý oryndaryn ashýǵa Shymkent jáne Petropavl qalalary tańdalǵan.
«Aldyn ala eki óńir anyqtaldy: Shymkent jáne Petropavl qalalary. Qazir jobalyq qujattamany daiyndap jatyrmyz. Ázirshe bul JOO-lar jumys istep turǵan ýniversitetterdiń janynan enshiles uiymdar retinde qurylady. Biraq olar zańdy tulǵalar bolady. Bizdiń paiymdaýymyzsha, olardy birdei akademiialyq dástúri bar JOO retinde emes, jeke-jeke zańdy tulǵa, qyzmetkerler jinaý, mádeniet pen dástúrin qalyptastyrý mańyzdy. Olardyń bilim berý baǵdarlamasyn halyqaralyq seriktestermen Nazarbayev University úlgisinde qurýdy josparlap otyrmyz. Arnaiy korpýstar ashý josparlanǵan, oǵan qarajat bólek bólinedi. Qazir eki óńirdiń ákimdikteri jer telimderin bólý jumystaryn júrgizýde. Jalpy, osy JOO-lar daiarlaityn negizgi baǵyttardy anyqtalyp jatyr. Sondyqtan, jalpy Nazarbayev University jumysynyń tájiribesi paidalanylady», - dedi Ashat Aimaǵambetov.
Ministrdiń aitýynsha, sapa Nazarbayev University tipi boiynsha bolady. Ol úshin sheteldik áriptester tartylady, halyqaralyq baǵdarlamalardy akkreditteý júrgiziledi.
