Bas prokýratýra jappai tártipsizdikter kezinde ustalǵan adamdy azaptaý boiynsha qylmystyq is qozǵalǵanyn málimdedi, dep habarlaidy Sputnik Qazaqstan.
"Áleýmettik jelilerde politsiia qyzmetkerleri A.B. Batyrbaevty uryp-soqqany týraly aqparat taralyp jatyr. Atalǵan azamat Taldyqorǵan qalasynda bolǵan tártipsizdikter kezinde quqyq qorǵaý organdary qyzmetkerlerine shabýyl jasaǵany úshin 22 qańtarda ustalǵan", - delingen resmi habarlamada.
Al 23 qańtarda jaýap alý kezinde ol 10 qańtarda ishki ister organdarynyń qyzmetkerleri ózine dene jaraqatyn keltirgeni týraly aitqan.
Almaty oblysynyń sybailas jemqorlyqqa qarsy qyzmeti A. Batyrbaevtyń aryzy negizinde azaptaý faktisi boiynsha qylmystyq is qozǵady. Qazirgi kezde tergeý sharalary atqarylyp jatyr.
Áleýmettik jelide taraǵan aqparatqa sáikes, 2022 jyldyń 5 qańtarynda Taldyqorǵanda narazylyq bildirýshiler Nazarbaevtyń eskertkishin buzyp tastaǵan. Azamat Batyrbaev júk kóligimen eskertkishti tartyp qulatqan.
Aita keteri, buǵan deiin Qazaqstannyń adam quqyqtary jónindegi ýákili Elvira Ázimova Atyraý qalasyna baryp, áleýmettik jelide taraǵan málimetti tekserip kelgen.
Onyń aitýynsha, bas prokýratýraǵa adam quqyqtaryn buzý boiynsha 91 aryz túsken. Sonyń ishinde azaptaý áreketteri de bar. 24 qańtarǵa deiin 8 aryz boiynsha Qylmystyq kodekstiń 146-baby (azaptaý) boiynsha tergeý sharalary bastaldy.
Osy isterdiń arasynda adam quqyqtary jónindegi ýákildiń atyna jazylǵan 5 shaǵym bar.
