Áleýmettik jelide Qazaqstan Prezidenti Nursultan Nazarbaevtyń «Aziia-Eýropa» forýmynyń 12-shi sammitine qatysqan sáti beinelengen video taraldy, dep habarlaidy QazAqparat tilshisi QR Prezidentiniń Teleradiokeshenine silteme jasap.
Esterińizge sala ketsek, Memleket basshysy Briýsselde «Aziia-Eýropa» (ASEM) forýmynyń 12-shi sammitine qatysty.
Sammit aiasynda Nursultan Nazarbaev Frantsiia Respýblikasynyń Prezidenti Emmaniýel Makronmen, Belgiia Koroli Filippen, Halyqaralyq saýda ortalyqtary qaýymdastyǵy (WTCA) basqarma tóraǵasynyń orynbasary Rolf Draakpen jáne «Nest Investments HOLDINGS» kompaniialar tobynyń korporativtik qyzmetter jónindegi direktory Mehran Efteharmen, Japoniia jáne Koreia elderiniń basshylarymen kezdesti.
Memleket basshysy sammittiń plenarlyq otyrysynda sóilegen sózinde qaqtyǵystardyń kóbeiýi, sanktsiia jáne saýda soǵystarynyń órshýi jaǵdaiynda halyqaralyq saiasat shielenistiń shegine jetip otyrǵanyn atap ótti.
«Biz búgingi «Aziia-Eýropa» forýmynyń sammitin osy problemalardy sheshý úshin paidalanýymyz qajet. Ókinishke qarai, qazirgi kezde álem tabysty dialog pen ózara túsinistikke qol jetkize almai keledi. Bárimiz ótken ǵasyrdyń 60-jyldaryndaǵy Karib daǵdarysyn eske salatyn búgingi ekonomikalyq jáne saiasi teketiresterge kýá bolyp otyrmyz», - dedi Qazaqstan Prezidenti.
Nursultan Nazarbaev bul sammit AQSh, Resei, Qytai siiaqty álemniń iri elderin, Eýropa odaǵyn halyqaralyq shielenisterdi sheshýdiń jolyn izdeýge shaqyrýy qajet ekenin aitty.
«Eger Siriiadaǵy, Ýkrainadaǵy jáne ózge de elderdegi problemalardy rettemesek, ahýal odan da kúrdelene túsedi. Ballistikalyq raketalardyń taralý qaýpi seiilmeiinshe, halyqaralyq terrorizm basty másele bolyp qala bermek», - dedi Memleket basshysy.
