Senat depýtaty, Halyqaralyq qatynastar, qorǵanys jáne qaýipsizdik komitetiniń tóraiymy Dariǵa Nazarbaeva Reseidiń qai óńirinde bolǵysy keletinin aitty, dep habarlaidy Sputnik Qazaqstan tilshisi.
Búgin Dariǵa Nazarbaeva bastaǵan komitet músheleri Reseidiń Federaldy jiyny Federatsiia keńesi qorǵanys jáne qaýipsizdik komiteti, halyqaralyq ister komitetiniń tóraǵalarymen kezdesti. Kezdesý barysynda reseilik senator Konstantin Kosachev Dariǵa Nazarbaevany Qazaqstan men Resei parlamentariileriniń kezdesýine shaqyrǵan bolatyn. Kosachev Kaliningradtan bastap Kamchatkaǵa deiin Nazarbaevany qarsy alýǵa daiyn ekenin aitqan edi.
"Kamchatkaǵa qatty barǵym keledi, tabiǵaty ádemi dep aitady. Biraq, meniń oiymsha, bizge shekaraǵa jaqyn óńirlerden bastaý kerek. Onda kóptegen integratsiialyq jumystar aqsap jatyr. Jergilikti ákimder, gýbernatorlarmen sóilesip, ol jaqta qandai máseleler kóterilip jatqanyn túsinýimiz kerek", - dedi Nazarbaeva kezdesýden keiin jýrnalisterge.
Osy oraida senat depýtaty Jaiyq ózenindegi balyqtardyń jappai qyrylýyna toqtaldy.
"Bizde transshekaralyq ózenderdiń máselesi, ekologiia problemasy bar. Jaiyq ózeni tartylyp barady. Qazir onda qanshama balyq qyrylyp jatqanyn ózderińiz kórip otyrsyzdar. Tonnalap ólip jatyr", - dep alańdaýshylyq bildirdi ol.
Nazarbaeva jýyrda ǵana jiyrma jyldyq kelissózden keiin Jaiyqty qutqarý boiynsha memorandým bekitilgenin atap ótti.
"Biraq, oǵan endi ǵana qol qoiylyp otyr. Naqty iske kóshkenshe, sheshim qabyldaý máseleleriniń ózi taǵy bir on jylǵa sozyla ma dep qorqamyn", - dedi senator.
