Qazaqstan Respýblikasy Parlamenti Senatynyń Tóraǵasy Dariǵa Nazarbaeva Túrkiia Uly Ulttyq Jinalysynyń Tóraǵasy Mustafa Shentoppen telefon arqyly sóilesti. Bul týraly "Ult aqparat" Senattyń baspasóz qyzmetine silteme jasap habarlaidy.
M.Shentop D.Nazarbaevany Naýryz merekesimen ári Senat basshysy bolyp sailanýymen quttyqtady jáne onyń Qazaqstan halqynyń igiligi jolyndaǵy qyzmetinde tabysqa jetýine tilektestigin bildirdi. Ol ekijaqty yntymaqtastyqty odan ári nyǵaitýǵa senim artty jáne Senat Tóraǵasyna Túrkiiaǵa saparmen barýǵa shaqyrdy.
D.Nazarbaeva jyly quttyqtaýlar úshin alǵysyn jetkizip, «Elbasynyń jańǵyrtýǵa baǵyttalǵan jolyn jalǵastyrý - basty mindet» ekenin atap ótti. Senat Tóraǵasy M. Shentopty halyqty áleýmettik qoldaý, ekonomikalyq ósý jáne investitsiialar tartý máselelerine basa nazar aýdarylǵan Qazaqstannyń damý strategiiasy týraly jan-jaqty habardar etti.
Taraptar ekijaqty yntymaqtastyq máselelerin, atap aitqanda, parlamentaralyq únqatysýdy nyǵaitý máselelerin talqylady. Senat Tóraǵasy Túrkiia Uly Ulttyq Jinalysynyń Tóraǵasyn 23-24 qyrkúiekte Nur-Sultan qalasynda ótetin Eýraziia elderiniń parlamentteri tóraǵalarynyń kezdesýine shaqyrdy. «Bizde kóptegen josparlar bar, olardy nátijeli iske asyrý úshin jumys isteimiz. Men Túrkiianyń órkendeýin, Sizderdiń Prezidentińiz Redjep Taiyp Erdoǵanǵa jáne búkil túrik halqyna tabys tileimin. Túrkiia - qýatty memleket jáne barlyq qiyndyqtardy jeńedi», - dep atap ótti D.Nazarbaeva.
M.Shentop Qazaqstan Respýblikasynyń Tuńǵysh Prezidenti N.Nazarbaevtyń Qazaqstannyń qalyptasýy men tabysty damýyndaǵy jetekshi róline joǵary baǵa berdi, sondai-aq Qazaqstan-Túrkiia qatynastaryn nyǵaitýǵa qosqan jeke úlesi úshin alǵys aitty.
