Máslihattar tabiǵatty qorǵaýǵa arnalǵan jergilikti biýdjet qarajatynyń maqsatty jáne tiimdi paidalanylýyn baqylaýǵa alýy tiis.
Bul týraly búgin Qazaqstan máslihattarynyń 25 jyldyǵyna arnalǵan respýblikalyq konferentsiiada QR Parlamenti Senatynyń tóraǵasy Dariǵa Nazarbaeva aitty, dep habarlaidy QazAqparat.
«Máslihat depýtattary men jergilikti ózin-ózi basqarý organdary óz aýmaqtaryndaǵy problemalardyń barlyǵyn da jaqsy biletindigi sózsiz. Soǵan sáikes olar memlekettik baǵdarlamalardy ázirleýge, tirek jáne spýtniktiń eldi mekenderdiń tizbesin túzýge barynsha belsendi qatysýy tiis», - dedi Senat spikeri.
Osy rette ol qazirgi ýaqytta Qazaqstan Úkimeti 2025 jylǵa deiin óńirlerdi damytýdyń memlekettik baǵdarlamasyn ázirlep jatqanyn jáne oǵan máslihat depýtattary men jergilikti ózin-ózi basqarý organdary aralasýy tiistigin basa aitty.
«Taiaýda, Senatta biz sý men sý únemdeý, turmystyq jáne ónerkásiptik qaldyqtardy jinaý jáne qaita óńdeý problemalary týraly aittyq. Qorshaǵan ortanyń lastanýy, sý sapasynyń nasharlyǵy adamdardyń densaýlyǵyna áser etip, ómirlerin qysqartady. Ekologiiamyzdy, týǵan jerimizdi saýyqtyrý boiynsha jedel naqty sharalar qajet. Olai bolmaǵan jaǵdaida jerimiz úlken qoqys alańyna ainalady», - dedi Dariǵa Nazarbaeva.
Senat spikeriniń dereginshe, kásiporyndar aǵyn sýlardyń shamamen 50 paiyzdan astamyn tazartpastan aǵyzyp jiberedi. Qatty turmystyq qaldyqtardy ornalastyrýǵa arnalǵan 3 500-den astam poligonnyń 17 paiyzy ǵana sanitarlyq normalarǵa sai keledi. 8 608 sanktsiialanbaǵan qoqys alańy anyqtalǵan. 2018 jyly qaita óńdelgen jáne joiylǵan turmystyq qaldyq úlesi nebári 11,5 paiyzdy quraǵan. Buǵan qosa, 30 mrld tonnadan astam ónerkásip qaldyǵy jinalyp qalǵan. 2018 jyly onyń nebári 32 paiyzy ǵana óńdelgen.
«Jergilikti atqarýshy organdar biýdjette tabiǵatty qorǵaý sharalaryna arnalǵan qarajattyń joqtyǵyn aityp shaǵymdanady. Bul oraida qorshaǵan ortany lastaý emissiiasy úshin barlyq tólemder jergilikti biýdjetke túskenimen basqa maqsattarǵa jumsalady. Barlyq deńgeidegi máslihattar tabiǵatty qorǵaýǵa arnalǵan jergilikti biýdjet qarajatynyń maqsatty jáne tiimdi paidalanylýyn baqylaýǵa alýy tiis», - dedi Dariǵa Nursultanqyzy.
