Parlament Senatynyń Tóraǵasy Dariǵa Nazarbaeva Qytai Halyq Respýblikasynyń Qazaqstandaǵy elshisi Chjan Siaony onyń ótinishi boiynsha qabyldady, dep habarlaidy "Ult aqparat" Senattyń baspasóz qyzmetine silteme jasap.
Senat Tóraǵasy kezdesýdi asha kelip Qytaimen strategiialyq jan-jaqty áriptestik qarym-qatynastyń erekshe mańyzyn atap ótti.
«Qazaqstan Elbasy N.Nazarbaev pen QHR Tóraǵasy Si Tszinpinniń joǵary deńgeidegi dostyq, tatý kórshilik jáne ózara túsinistik negizindegi kelisimderin júzege asyrýdy jalǵastyrýǵa nietti. Strategiialyq jan-jaqty áriptestik qarym-qatynastaryn nyǵaitý baǵytyn ustanatynymyzdy naqtylaimyz», - dedi D. Nazarbaeva.
Chjan Siao QHR Halyq ókilderi Búkilqytailyq jinalysy Turaqty komitetiniń tóraǵasy Li Chjanshýdyń D. Nazarbaevaǵa Senat Tóraǵasy qyzmetine sailanýymen quttyqtaýyn jetkizdi jáne budan bylaiǵy jumysy tabysty bolýyna tilektestigin bildirdi.
«Biz Sizdiń parlamentaralyq bailanystardy damytýǵa jáne Qytaidyń «Bir beldeý, bir jol» bastamasyn qoldaýǵa qosqan jeke úlesińizdi joǵary baǵalaimyz», - dedi ol.
Qytai elshisi Qazaqstannyń Tuńǵysh Prezidenti N. Nazarbaevtyń 2-shi halyqaralyq «Bir beldeý, bir jol» yntymaqtastyǵy forýmyna qatysý úshin Beijiń qalasyna baratyn aldaǵy saparyna daiyndyq týraly Senat basshysyn habardar etti.
Júzdesýshiler saýda-ekonomikalyq bailanystardy damytýdaǵy oń úrdister men bizdiń elderimiz arasyndaǵy taýar ainalymy kóleminiń ósýin atap ótip, investitsiia, aýyl sharýashylyǵy, týrizm, mádeni-gýmanitarlyq yntymaqtastyq salasyndaǵy ózara is-qimyldy kúsheitý múmkindikteri bar ekenine toqtaldy.
Senat basshysy eki el arasyndaǵy jastar yntymaqtastyǵyn belsendi damytý, atap aitqanda, stýdentter almasýdy jáne bilim granttaryn berýdi jolǵa qoiý qajettigin atap ótti.
D. Nazarbaeva ShUAA-daǵy qazaqtar taqyrybyn qozǵai kelip, QHR-daǵy etnikalyq qazaqtar Qazaqstan men Qytai arasyndaǵy qarym-qatynasta «dostyq kópiri» ekenin atap ótti. Taraptar osy salada týyndaityn máselelerdi ózara negizde syndarly túrde sheshýge ýaǵdalasty.
Kezdesý barysynda Senat Tóraǵasy Qazaqstan azamattary úshin týristik jáne jeke viza berýdi jańǵyrtý máselesin kóterdi.
