Densaýlyq saqtaý júiesi týraly jańa kodekstiń jobasymen jumys barysynda senatorlar osy salanyń tótenshe jaǵdai kezindegi problemalyq máselelerin eskergeni durys. Bul týraly Parlament Senatynyń tóraǵasy Dariǵa Nazarbaeva málim etti, dep habarlaidy "Ult aqparat".
«Qasym-Jomart Kemeluly óz Málimdemesinde meditsinany damytýǵa erekshe kóńil bóldi. Bul sala aýqymdy memlekettik qoldaýǵa ie bolady. Prezident halyqtyń densaýlyǵyn qorǵaý júiesin jaqsartý jónindegi naqty usynystardy qarastyra otyryp, halyq densaýlyǵy men densaýlyq saqtaý júiesi týraly jańa Kodeks qabyldaýdy tapsyrdy. Osy asa mańyzdy qujatpen biz, qurmetti áriptester, jaqyn arada jumysty bastaimyz.
Halyq densaýlyǵy jáne densaýlyq saqtaý júiesi týraly jańa Kodekstiń jobasymen jumys isteý kezinde senatorlar osy salanyń tótenshe jaǵdai kezindegi problemalyq máselelerin eskergeni durys dep sanaimyn», - dedi D. Nazarbaeva Senattyń jalpy otyrysynda.
Sonymen qatar ol pandemiia qoǵamnyń artyqshylyqtary men damý qundylyqtaryn túbegeili ózgertkenin atap ótti.
«Azamattardyń ómiri men densaýlyǵyn saqtaý árqashan memlekettik saiasattyń negizgi máselesi bolyp kelgen, biraq bul mindet qazirgidei ótkir bolǵan emes. Osydan kelip barsha qoǵam elimizdegi meditsinany damytý strategiiasyna airyqsha nazar aýdaryp otyr. Biz elimizdiń júie qalyptastyrýshy kásiporyndar tiziminiń jobasyn kórdik. Onyń qurylý printsipterine qatysty depýtattar óz pikirlerin ashyq aitty. Biraq mynadai suraq týyndaidy – osy tizimde meditsinalyq maska nemese dezinfektsiia quraldaryn shyǵaratyn tym bolmaǵanda bir kásiporyn bar ma? Al Prezidenttiń tapsyrmasy boiynsha otandyq test-júielerin, immýndy biologiialyq preparattardy óndiretin, koronovirýs infektsiiasyna qarsy vaktsina shyǵarýǵa daiyn kásiporyndar qaida?
Munai men paidaly qazbalardan tabys azaiǵan jaǵdaida, biz rasynda da budan ári osy ómirlik mańyzy bar taýarlardy valiýtamen importtaýdy jalǵastyrmaqpyz ba? Búgin bul tipten ritorikalyq suraqtar emes. Qazirgi kezde bizge memlekettik saiasat basymdyqtary týraly burynǵydan da salmaqty áńgime qajet, atqarýshy biliktiń problemalary men josparlary jariia jáne ashyq túrde talqylanýy kerek», - dedi Dariǵa Nazarbaeva.
