Qazaqstan parlamenti senatynyń depýtaty Dariǵa Nazarbaeva beisenbi kúni Astanada ótken áskeri-patriottyq tárbie máseleleri jónindegi vedomstvoaralyq kezdesýde qazaqstandyqtar eldegi turaqtylyqtyń arqasynda "úlken baqytqa" - ómirin josparlaý múmkindigine ie bolyp otyrǵanyn aitty.
QazAqparat agenttiginiń habarlaýynsha, Dariǵa Nazarbaeva bul sózin kadet korpýsynyń oqýshylary jáne áskeri-patriottyq klýbtarǵa baratyn balalar aldynda aitqan.
"Biz biligi ornyqqan, saiasaty turaqty, barlyǵyn boljaýǵa bolatyn beibit elde ómir súrip jatyrmyz jáne siz ben bizdiń ómirimizdi aldaǵy birneshe jylǵa boljaýǵa bolady. Úlken baqyt degen - ol bilim alamyn, odan ary jumys isteimin, maqsatyma jetemin dep óz ómirińdi josparlaýǵa múmkindigiń bolý" dedi Dariǵa Nazarbaeva.
Sonymen birge, Dariǵa Nazarbaeva kezdesýge kelgen depýtattar men ministrler nazaryn jastardyń azamattyq paryzy men jaýapkershik sezimin qalyptastyrý máselesine aýdardy.
Onyń pikirinshe, bul baǵytta mektepterdegi áskeri-patriottyq klýbtar mańyzdy ról atqarady.
«Bizge jas áskeri qurylymdardy memlekettik deńgeide damytý men qoldaý boiynsha biregei respýblikalyq baǵdarlama qajet», - dep óz sózin tolyqtyrdy Dariǵa Nazarbaeva.
54 jastaǵy Nazarbaeva ótken jyly qyrkúiekte Memleket basshysynyń buiryǵymen senator bolyp taǵaiyndalǵan. Ol senatta halyqaralyq qatynastar, qorǵanys jáne qaýipsizdik komitetin basqarady.
