Nazarbaev ziiatkerlik mektebine oqýǵa túskisi keletin talapker túsiniksiz tilde án aitatyn atyraýlyq «ánshi» MS Sailaýbek týraly bilýi tiis. Óitkeni, oqý ornyna túsýge arnalǵan test kitapshasynda "qazaq reperi" týraly suraq kezdesedi, dep habarlaidy Ult.kz tilshisi sn.kz portalyna silteme jasap.
Buǵan árine sengimiz kelmeidi. Óitkeni, aty dardai mektepte naǵyz ziiatkerler oqýy tiis-tin. Alaida, Facebook áleýmettik jelisinde paida bolǵan videony kórgennen keiin amal joq, ilanýymyzǵa týra keldi.
Jelige atalǵan videony Kiikbai Jaqypuly esimdi azamat júktegen. Kameraǵa túsirgen adam bul test kitapshasy Nazarbaev ziiatkerlik mektebine túsýshilerge arnalǵanyn jáne ol qazaq tili páninen ekenin aitqan, aityp qana qoimai, muqabany jaqyn planmen kórsetken.
Oqýlyqty Serikbolsyn Dúisembai men Qazbek Saǵidolda jazǵan. Kitap 2018 jyly jaryq kórgen.
Synaq kitapshasynda aldymen Sailaýbek týraly qysqasha málimet berilip, keiin test suraǵy keltiriledi. Onda: «MS Sailaýbketiń juldyz bolýyna ne áser etti?» delingen jáne tórt jaýap berilgen.
Atalǵan videony myńdaǵan adam kórip, muny baryp turǵan bassyzdyq, qazaq balalaryna qasaqana jasalyp jatqan qastandyq ekenin jazýda. Este bolsa, qoǵam belsendileri buǵan deiin de Bilim jáne ǵylym ministrliginiń reformalaryn qatań synǵa alyp, olardy ult bolashaǵyna tóngen qaýip dep baǵalaǵan edi.
Ile-shala MS Sailaýbektiń esimin oqý quralyna engizgen avtorlardyń biri óz qatesin moiyndap, elden keshirim surady.
– Bul negizi daiyndyqqa arnalǵan mátin edi. Al mátinderdi biz ártúrli ortalyqtan jinap, baspaǵa jiberemiz. Sonda daiyndyqqa arnalǵan mátinniń bir bóligin jibergenimizde materialdyq bazadaǵy osy mátin de ketip qalypty. Ony kitap shyqqan soń biraq baiqadyq. Bul jaǵdaidan keiin qatemizdi eskerip, kelesi basylymnan Sailaýbek týraly málimetti alyp tastadyq. Bizdiń maqsatymyz – Sailaýbekti nasihattaý emes, oqýshylardy daiyndaý. Byltyr shyǵarǵanymyzda mundai bolmaǵan edi, biyl keleńsiz jaǵdaiǵa tap boldyq. Óz qatemizdi moiyndaimyz. Bul oqý quralynda qamtylǵan 400 suraqtyń biri ǵana bolsa da, keshirim suraimyz. Elden biik emespiz, - dedi Qazbek Saǵidolda.
Feisbýk áleýmettik jelisinde synaq kitapshasynyń ekinshi avtory da jaýap bergen. Ol oryn alǵan jaitqa qatysty óz pikirin bildirip, mundai qoǵamnan "sharshaǵanyn" jáne elge oralǵysy kelmeitinin de jetkizgen.
