Memleket basshysy N.Nazarbaev jumys saparymen Birikken Arab Ámirlikterine bardy, dep habarlaidy "Ult aqparat" Aqordaǵa silteme jasap.
Nursultan Nazarbaev jumys sapary aiasynda Abý-Dabidiń taq murageri, Birikken Arab Ámirlikteriniń Qarýly Kúshteri Joǵarǵy Bas qolbasshysynyń orynbasary sheih Muhammed ben Zaid Ál Nahaianmen kezdesti.
Qazaqstan Prezidenti dástúrli qonaqjailyq kórsetkeni úshin taq muragerine rizashylyq bildirip, Dúniejúzilik Arnaiy Olimpiada oiyndary Taiaý Shyǵys elderiniń ishinde Birikken Arab Ámirlikterinde alǵash ret ótip otyrǵanyna toqtaldy.
– Bul mańyzdy sport sharasy múmkindigi shekteýli sportshylarǵa ózderiniń myqty rýhy men jeńiske degen erik-jigerin tanytýǵa jol ashady. Jarysqa Qazaqstan komandasy da qatysady. Elderińizdiń basshylyǵy Qazaqstan ótkizetin halyqaralyq is-sharalardyń bárine únemi qatysyp keledi. Sondyqtan, sizderge dostyq qoldaý kórsetý maqsatymen osy oiyndardyń saltanatty ashylý rásimine qatysýǵa keldim, – dedi Memleket basshysy.
Nursultan Nazarbaev ótken jyl eki el arasyndaǵy ózara tiimdi yntymaqtastyqty nyǵaitý úshin jemisti bolǵanyn atap ótti.
– Bizdiń jii kezdesýlerimiz ben baýyrlastyqqa jáne senimge negizdelgen tyǵyz qarym-qatynastarymyz barlyq salalardy jan-jaqty damytýǵa tyń serpin berýde. Byltyr biz ózara sapar jasap, mańyzdy ýaǵdalastyqtarǵa qol jetkizdik. Solardyń iske asyrylý barysy tolyq kóńilden shyǵady, – dedi Qazaqstan Prezidenti.
Muhammed ben Zaid Ál Nahaian Birikken Arab Ámirlikterine shaqyrýyn qabyl alǵany úshin Nursultan Nazarbaevqa alǵys aityp, konfessiiaaralyq kelisim men álemde dialog ornatý isindegi Qazaqstannyń róline erekshe toqtaldy.
– Biyl biz elimizdiń negizin qalaǵan tulǵanyń 100 jyldyǵyn saltanatty túrde atap óttik. Siz sheih Zaidti 25 jyldan astam ýaqyttan beri bilesiz. Ol Sizdi óte qurmetteitin jáne álemdik deńgeidegi basshy retinde tanityn. Biz sizderdi úlgi tutyp, 2019 jyldy – toleranttylyq jyly dep jariialadyq. Sonyń aiasynda Ámirlikter kópultty, mádenietaralyq jáne dinaralyq ortalyqqa ainalýdy kózdeidi. Osyǵan bailanysty biylǵy aqpan aiynda Rim Papasy Frantsisktiń Birikken Arab Ámirlikterine tarihi sapary boldy, – dedi sheih Muhammed ben Zaid Ál Nahaian.
Kezdesý barysynda taraptar halyqaralyq kún tártibindegi ózekti problemalardy, týrizm, tsifrlandyrý, ǵarysh, kólik, logistika jáne aýyl sharýashylyǵy salalaryndaǵy yqpaldastyqty talqylady. Sondai-aq ózara ekonomikalyq yntymaqtastyqty jandandyrý, investitsiia tartý jáne Qazaqstan taýarlaryn Birikken Arab Ámirlikteriniń naryǵyna shyǵarý maqsatymen Úkimetaralyq komissiianyń jáne Iskerlik keńestiń áleýetin arttyrý máseleleri qaraldy.
