Elbasy Qazaqstannyń halyq ártisi Doshan Joljaqsynovty qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Nursultan Nazarbaev Doshan Joljaqsynovtyń otandyq kinematografiia jáne teatr ónerin damytýǵa sińirgen eńbegin erekshe atap ótti.
– Siz – otandyq mádeniettiń kórnekti ókilderiniń birisiz, Qazaqstannyń halyq ártisisiz. Uzaq jyldar boiy balalar men jasóspirimder teatryna basshylyq ettińiz. Osy ýaqyt ishinde mádenietimizdiń damýyna jáne Qazaqstan qoǵamynyń rýhani turǵydan jańǵyrýyna zor úles qostyńyz, – dedi Memleket basshysy.
Qazaqstan Prezidenti kinoindýstriianyń mańyzdylyǵyn airyqsha atap ótip, onyń qazirgi mádeniet salasynda alatyn ornyna toqtaldy.
– Búginde kino ulttyq sana-sezim men tól mádenietimizdi beineleitin negizgi quraldyń birine ainaldy. Sondyqtan men sizdi otandyq kinomyzdy odan ári damytý máselelerin talqylaý úshin shaqyrdym, – dedi Elbasy.
Doshan Joljaqsynov Nursultan Nazarbaevqa Qazaqstannyń kinematografiia ónerine erekshe kóńil bólip otyrǵany úshin alǵys aitty.
– Sizdiń jan-jaqty qoldaýyńyzdyń arqasynda qazirgi kinoindýstriia salasy damýdyń jańa satysyna kóterildi. Qiyndyqtarǵa qaramastan, «Kóshpendiler» filmin túsirip, halqymyzdyń tarihyn kúlli álemge tanyttyq. Sodan keiin «Jaý júrek myń bala» men «Almas qylysh» filmderi, sondai-aq meniń «Birjan sal», «Qunanbai» filmderim jáne basqa kinotýyndylar túsirildi. Elimizdiń búkil óńirin aralap, «Qunanbai» filmin kórsettik. Biz kino arqyly tarihi oqiǵalar men qazaq halqynyń minez-qulqyn beinelep, jurtshylyq sanasyna rýhani jańǵyrýdyń negizgi ideialaryn sińirýge tyrystyq, – dedi halyq ártisi.
