Qyrǵyzstan prezidenti Sooronbai Jeenbekov 25-26 jeltoqsanda resmi saparmen Qazaqstanǵa keledi, dep habarlaidy Sputnik Qyrǵyzstan QR basshysy apparaty syrtqy saiasat bóliminiń meńgerýshisi Aizada Sýbakojoevaǵa silteme jasap.
Buǵan deiin Nazarbaev pen Jeenbekov aldaǵy kezdesýler kestesin qarap shyqqan bolatyn.
"Nursultan Nazarbaevtyń shaqyrýymen 25-26 jeltoqsanda Qyrǵyzstan prezidenti Qazaqstanǵa resmi saparmen barady. Shaǵyn jáne keńeitilgen quramda kezdesýler ótedi, taraptar ekijaqty yntymaqtastyq pen EAEO aiasynda ózara is-qimyl máseleleri boiynsha pikir almasady. Sondai-aq premer-ministrmen kezdesý ótedi", — dedi Sýbakojoeva.
Onyń aitýynsha, aldaǵy kelissózder "Jol kartasyn" iske asyrýǵa serpin bermek.
"Qyrǵyz tarapy teń quqyqtyq, ózara tiimdilik jáne qurmet negizinde dostyq qarym-qatynas pen seriktestikti odan ári nyǵaitýǵa múddeli",- dedi Sýbakojoeva.
Bólim basshysy memlekettik shekarany kesip ótý rejimi men demarkatsiialaý týraly qujattarǵa, birlesken málimdemege qol qoiý josparlanyp otyrǵanyn atap ótti.
Esterińizge sala keteiik, Qyrǵyzstanda qazan aiynyń ortasynda ótken prezident sailaýynda Sooronbai Jeenbekov jeńiske jetken edi. Qyrǵyzstannyń burynǵy basshysy Almazbek Atambaev prezident bolǵan kezinde Qazaqstan basshylyǵyn eldiń sailaý naýqanyna aralasty dep aiyptaǵan bolatyn. Qazaqstan "sur" importpen kúres maqsatynda Qyrǵyzstanmen shekarada baqylaýdy biraz ýaqytqa kúsheitti.
