Biyl «Nazarbaev Ziiatkerlik mektepteri» derbes bilim berý uiymyna - 10 jyl. Osyǵan orai búgin Nazarbaev ýniversitetinde «Uly dala muragerleri» atty oqýshylar men pedagogtardyń forýmy ótti. Saltanatty jiynǵa Qazaqstan prezidenti Nursultan Nazarbaev qatysty.
Memleket basshysy «Nazarbaev Ziiatkerlik mektepteriniń» oqýshylaryn ekinshi shet tili retinde qytai tilin tańdaýǵa shaqyrdy. Elbasy qazaqstandyq jastarǵa qytai tilin oqýdyń mańyzy jaily aityp berdi.
«Biylǵy jyly Ziiatkerlik mektepterde oqýshylardyń tańdaýy boiynsha ekinshi shet tili oqytyla bastady. Jahandaný jaǵdaiynda shet tilderin bilý astamshylyqqa emes, ómirlik qajettilikke ainaldy. Tilderdi bilý basqa adamdardyń mentalitetin, mádenietin túsinýge jol ashyp, joǵary bilim alý men jumysqa ornalasý kezinde tańdaýdy keńeitýge múmkindik beredi», - dedi Nazarbaev.
Memleket basshysynyń aitýynsha, oqýshy kez kelgen tildi tańdai alady. Eń kóp taraǵan aǵylshyn tili, ekinshi orynda – ispan tili.
«Biraq biz úshin qytai tili mańyzdy. Bizdiń Qytaimen saýda-sattyǵymyzdyń kólemi óte úlken, Reseimen teń. Qazaqstannyń Qytai Halyq Respýblikasymen saýda-sattyq kólemi - 20%, Reseimen - 22%, al Eýropa odaǵymen - 30%. Aǵylshyn tili asa qajet. Sebebi barlyq jerde, Japoniiada da, Qytaida da biznes aǵylshyn tilinde sóileidi. 1,5 mlrd halyq qytai tili basym bolady dep otyr. Men qytai tilin oqyp kórgen joqpyn, biraq qazaqtarǵa basqalarǵa qaraǵanda oqyǵan jeńil dep aitady», - dedi Nursultan Nazarbaev.
