بيىل «نازارباەۆ زيياتكەرلٸك مەكتەپتەرٸ» دەربەس بٸلٸم بەرۋ ۇيىمىنا - 10 جىل. وسىعان وراي بٷگٸن نازارباەۆ ۋنيۆەرسيتەتٸندە «ۇلى دالا مۇراگەرلەرٸ» اتتى وقۋشىلار مەن پەداگوگتاردىڭ فورۋمى ٶتتٸ. سالتاناتتى جيىنعا قازاقستان پرەزيدەنتٸ نۇرسۇلتان نازارباەۆ قاتىستى.
مەملەكەت باسشىسى «نازارباەۆ زيياتكەرلٸك مەكتەپتەرٸنٸڭ» وقۋشىلارىن ەكٸنشٸ شەت تٸلٸ رەتٸندە قىتاي تٸلٸن تاڭداۋعا شاقىردى. ەلباسى قازاقستاندىق جاستارعا قىتاي تٸلٸن وقۋدىڭ ماڭىزى جايلى ايتىپ بەردٸ.
«بيىلعى جىلى زيياتكەرلٸك مەكتەپتەردە وقۋشىلاردىڭ تاڭداۋى بويىنشا ەكٸنشٸ شەت تٸلٸ وقىتىلا باستادى. جاھاندانۋ جاعدايىندا شەت تٸلدەرٸن بٸلۋ استامشىلىققا ەمەس, ٶمٸرلٸك قاجەتتٸلٸككە اينالدى. تٸلدەردٸ بٸلۋ باسقا ادامداردىڭ مەنتاليتەتٸن, مەدەنيەتٸن تٷسٸنۋگە جول اشىپ, جوعارى بٸلٸم الۋ مەن جۇمىسقا ورنالاسۋ كەزٸندە تاڭداۋدى كەڭەيتۋگە مٷمكٸندٸك بەرەدٸ», - دەدٸ نازارباەۆ.
مەملەكەت باسشىسىنىڭ ايتۋىنشا, وقۋشى كەز كەلگەن تٸلدٸ تاڭداي الادى. ەڭ كٶپ تاراعان اعىلشىن تٸلٸ, ەكٸنشٸ ورىندا – يسپان تٸلٸ.
«بٸراق بٸز ٷشٸن قىتاي تٸلٸ ماڭىزدى. بٸزدٸڭ قىتايمەن ساۋدا-ساتتىعىمىزدىڭ كٶلەمٸ ٶتە ٷلكەن, رەسەيمەن تەڭ. قازاقستاننىڭ قىتاي حالىق رەسپۋبليكاسىمەن ساۋدا-ساتتىق كٶلەمٸ - 20%, رەسەيمەن - 22%, ال ەۋروپا وداعىمەن - 30%. اعىلشىن تٸلٸ اسا قاجەت. سەبەبٸ بارلىق جەردە, جاپونييادا دا, قىتايدا دا بيزنەس اعىلشىن تٸلٸندە سٶيلەيدٸ. 1,5 ملرد حالىق قىتاي تٸلٸ باسىم بولادى دەپ وتىر. مەن قىتاي تٸلٸن وقىپ كٶرگەن جوقپىن, بٸراق قازاقتارعا باسقالارعا قاراعاندا وقىعان جەڭٸل دەپ ايتادى», - دەدٸ نۇرسۇلتان نازارباەۆ.
