Memleket basshysy Qazaqstan Respýblikasy Qorǵanys ministrliginiń basshylyq quramymen keńes ótkizdi, dep habarlaidy Aqordanyń baspasóz qyzmeti.
Keńes barysynda Nursultan Nazarbaev 25 jyl ishinde Qazaqstan Qarýly Kúshteri memleket pen jeke quramnyń kúsh-jigeriniń arqasynda myqty áskeri áleýeti bar el táýelsizdiginiń senimdi tiregine ainalǵanyn atap ótti.
«Sońǵy jyldary Qarýly Kúshterdi damytý isinde kóptegen jumys atqaryldy. Birqatar mańyzdy strategiialyq qujattar qabyldandy, sonyń ishinde Ulttyq qaýipsizdik strategiiasy, Qazaqstan Respýblikasynyń Áskeri doktrinasy, Qarýly Kúshterdi damytý tujyrymdamasy jáne qorǵanys salasyna qatysty normativtik quqyqtyq aktiler bar», - dedi Qazaqstan Prezidenti.
Memleket basshysy geosaiasi ahýaldyń ózgerýi jáne jańa syn-qaterlerdiń paida bolýy jaǵdaiynda Qorǵanys ministrliginiń aldynda turǵan negizgi mindetterdiń biri qarý-jaraqtardy tehnologiialyq turǵydan jetildirý jáne jańǵyrtý bolyp sanalatynyn aitty.
«Sondyqtan, Qorǵanys ministri laýazymyna azamattyq tulǵany, iaǵni, qaýipsizdik jónindegi kómekshim - Qaýipsizdik Keńesiniń hatshysy Ermekbaev Nurlan Baiuzaqulyn taǵaiyndaýǵa sheshim qabyldadym. Sonymen birge, N.Ermekbaev kadrlyq ofitser, áskeri qyzmette tájiribesi bar, sonyń ishinde shielenis aimaqtarynda bolǵan. Ol halyqaralyq máseleler jónindegi kómekshi, Qytaida jáne Ońtústik Shyǵys Aziianyń birqatar elinde elshi, ministr jáne eki ret Qaýipsizdik Keńesiniń hatshysy qyzmetterin atqardy», - dedi Nursultan Nazarbaev.
Memleket basshysy zamanaýi talaptardy eskere otyryp, áskeri kadrlardyń daiyndyǵyn jetildirý qajettigine nazar aýdardy.
«General-polkovnik Sáken Ádilhanuly Jasuzaqovqa qaltqysyz qyzmet etkeni úshin rizashylyq bildiremin jáne oǵan Ulttyq qorǵanys ýniversitetin basqarýdy tapsyramyn. Ýniversitet aldynda Qarýly Kúshterdiń basqarý quramynyń biliktiligin arttyrý jáne áskeri ǵylymdy damytý jónindegi mańyzdy mindetter tur. Ýniversitet elimizdiń ǵana emes, sondai-aq kórshiles elderdiń de kýrsanttary oqityn negizgi ǵylym, bilim ortalyǵyna ainalýy tiis», - dedi Qazaqstan Prezidenti.
Sońynda Qazaqstan Prezidenti elimizdiń Qarýly Kúshterin odan ári damytý jóninde birqatar naqty tapsyrma berdi.
