Memleket basshysy áleýmettik qamsyzdandyrý júiesin jetildirýge baǵyttalǵan "Qazaqstan Respýblikasynyń keibir zańnamalyq aktilerine áleýmettik qamsyzdandyrý máseleleri boiynsha ózgerister men tolyqtyrýlar engizý týraly" Qazaqstan Respýblikasynyń Zańyna qol qoidy, - dep habarlaidy"Ult aqparat" kaz.tengrinews.kz portalyna silteme jasap.
QR densaýlyq saqtaý jáne áleýmettik damý ministri Tamara Dúisenova 2017 jyly bala týýyna bailanysty beriletin járdemaqy men zeinetaqy mólsheriniń qalai ósetinin túsindirgen bolatyn.
Sol kezde Dúisenova 2017 jylǵy 1 shildeden bastap bazalyq jáne yntymaqty zeinetaqy mólsheriniń 20 paiyzǵa ósetinin habarlaǵan.
"2017-2019 jyldarǵa arnalǵan biýdjetke sáikes, yntymaqty zeinetaqynyń mólsheri 2017 jylǵy 1 qańtardan bastap 9 paiyzǵa, Memleket basshysynyń tapsyrmasyn oryndaý maqsatynda 2017 jyldyń 1 shildesinen taǵy da 11 paiyzǵa ulǵaitylady. Máselen, eger yntymaqty zeinetaqy mólsheri 2016 jyly 40 000 teńge bolsa, 2017 jyldyń 1 qańtarynan bastap 9 paiyzǵa arttyrylyp, 43 600 teńgeni quraityn bolady. 2017 jyldyń 1 shildesinen bastap taǵy 11 paiyzǵa ulǵaitylyp, jalpy mólsheri 48 396 teńge bolady. Osylaisha, 2017 jyly yntymaqty zeinetaqy mólsheri 2016 jylmen salystyrǵanda 20 paiyzǵa ulǵaitylmaq. Bazalyq zeinetaqy 2017 jylǵy 1 qańtardan 7 paiyzǵa, Memleket basshysynyń tapsyrmasyn oryndaý maqsatynda 2017 jyldyń 1 shildesinen taǵy da 13 paiyzǵa ulǵaitylady. Máselen, aǵymdaǵy jyly eger bazalyq zeinetaqy mólsheri 11 965 teńge bolsa, 2017 jyldyń 1 qańtarynan bastap 7 paiyzǵa arttyrylyp, 12 802 teńgeni quraityn bolady. 2017 jyldyń 1 shildesinen bastap taǵy 13 paiyzǵa ulǵaitylyp, jalpy mólsheri 14 466 teńge bolady. Osylaisha, 2017 jyly bazalyq zeinetaqy mólsheri 2016 jylmen salystyrǵanda 20 paiyzǵa arttyrylady", - dep túsindirgen edi Tamara Dúisenova.
Sonymen qatar, Ministr 2,1 millionǵa jýyq zeinetkerdiń zeinetaqysyn arttyrý maqsatynda respýblikalyq biýdjetten qosymsha 79,8 milliard teńge bólinetinin atap aitqan edi.
Joǵaryda atalǵan ózgeristerdi eskere otyryp, zeinetaqynyń eń tómengi mólsheri (bazalyq zeinetaqyny eseptegende) 2016 jylǵy 37 789 teńgeden 2017 jylǵy 1 shildede 45 711 teńgege artady. Zeinetaqynyń ortasha mólsheri (bazalyq zeinetaqyny eseptegende) 55 154 teńgeden 66 721 teńgege deiin ulǵaiady.
Bala týýyna bailanysty beriletin bir jolǵy memlekettik járdemaqy mólsheri 2017 jylǵy 1 qańtardan 7 paiyzǵa, al 2017 jylǵy 1 shildeden taǵy 20 paiyzǵa arttyrylady. Nátijesinde 2017 jyly 2016 jylmen salystyrǵanda ósim 27 paiyzǵa teń bolady.
"Aǵymdaǵy jyly birinshi, ekinshi, úshinshi balanyń týýyna bailanysty beriletin bir jolǵy memlekettik járdemaqy mólsheri 66 621 teńge bolsa, 2017 jylǵy 1 qańtarda 71 270 teńge bolyp, 1 shildede 86 222 teńgege deiin artpaq. Aǵymdaǵy jyly tórtinshi balanyń týýyna bailanysty beriletin bir jolǵy memlekettik járdemaqy mólsheri 111 035 teńge bolsa, 2017 jylǵy 1 qańtarda 118 myń teńge bolyp, 1 shildede 142 947 teńgeni quramaq", - dep túsindirgen edi Tamara Dúisenova.
Jalpy alǵanda, joǵaryda atalǵan zeinetaqy men járdemaqy mólsherleriniń artýyna respýblikalyq biýdjetti naqtylaý kezinde qosymsha 81,6 milliard teńge qarastyrylǵan.
Eske salaiyq, Prezident 2016 jyldyń 15 jeltoqsanynda Táýelsizdiktiń 25 jyldyǵyn arnalǵan saltanatty sharada zeinetaqy men bala týǵanda beriletin járdemaqyny ósirýdi tapsyrǵan edi. "Men úkimetke kelesi jyly 2016 jylmen salystyrǵanda zeinetaqy mólsherin 20 paiyzǵa ósirýdi tapsyramyn. Bul 2,2 million qazaqstandyqty qamtýy tiis. Sonymen qatar, 2017 jyldyń 1 shildesinen bastap balanyń dúniege kelýine orai beriletin bir rettik járdemaqy mólsherin 20 paiyzǵa ósirýdi tapsyramyn, - dedi Nazarbaev. - Qazirgi ýaqytta bizdiń elde balalardyń dúniege kelýi óte joǵarǵy deńgeide. 55 paiyzǵa ósti, bul biz úshin óte jaqsy", - degen edi Elbasy.
.jpeg)