Qazaqstan Prezidenti Ulttyq bank tóraǵasy Daniiar Aqyshevti qabyldady, dep habarlaidy "Ult aqparat" Aqordaǵa silteme jasap.
Kezdesý barysynda Memleket basshysyna Ulttyq banktiń 2018 jyly atqarǵan jumysynyń qorytyndysy jóninde esep berilip, eldegi valiýta-qarjy naryǵynyń qazirgi ahýaly týraly baiandaldy.
Elbasy birqatar ekonomikalyq indikatorlardyń oń qarqynmen ósip kele jatqanyn atap ótip, infliatsiia deńgeiin tómendetý úshin qabyldanyp jatqan sharalardyń tiimdiligi týraly máselege toqtaldy.
– 5,3 paiyz deńgeiindegi infliatsiia – bul jaqsy kórsetkish. Biraq, buǵan ekonomikanyń tiimdiliginen emes, naryqtaǵy ótimdilik kóleminiń qysqarýy esebinen qol jetkizilip otyr. Ulttyq bank pen Úkimettiń bul baǵyttaǵy jumysy nashar. Qarajatty ainalymnan shyǵarý arqyly infliatsiiany odan ári tómendetýge bolady, biraq bul sheshimniń ekonomikaǵa qalai áser etetini belgisiz. Sonymen qatar, uzaq merzimdi nesielerdiń azaiǵanyn baiqaýǵa bolady, – dedi Nursultan Nazarbaev.
Qazaqstan Prezidenti qoldanystaǵy zańnamaǵa birqatar ózgerister engizilgenine toqtalyp, Ulttyq bank tarapynan bul salaǵa tiisti baqylaý júrgizilýi qajet ekenin aitty.
Daniiar Aqyshev Memleket basshysynyń Qazaqstan halqyna arnalǵan Joldaýynda aitylǵan qaita óńdeý ónerkásibin nesieleý jónindegi tapsyrmalardyń oryndalý barysy týraly áńgimeledi.
Sondai-aq, Ulttyq bank tóraǵasy Qazaqstan Prezidentine ulttyq valiýta baǵamynyń ózgerýine yqpal etetin faktorlar týraly baiandady.
– Teńgeniń AQSh dollaryna shaqqandaǵy aiyrbas baǵamy jyl ishinde 15,6 paiyzǵa tómendedi. Buǵan, negizinen, syrtqy faktorlar sebepshi boldy. Álemdegi munai baǵasy óte qubylmaly bolyp otyr. Syrtqy jaǵdailar, sonyń ishinde qoldaýshylyq pen sanktsiialyq saiasat ta turaqty emes. Dei turǵanmen, erkin aiyrbas baǵamy rejimi barlyq aýyrtpalyqty jeńildetip, ótken jyldyń sońynda 30,9 milliard AQSh dollaryn quraityn altyn valiýta rezervin saqtap qalýǵa múmkindik berdi. Ulttyq qordyń shetel valiýtasyndaǵy aktivi 57,7 milliard AQSh dollaryna jetti, – dedi Elbasy.
D.Aqyshev qarjy naryǵyn nesieleý jáne saýyqtyrý úshin atqarylyp jatqan jumystar jóninde málimdedi.
– Biz qarjy sektoryn jaqsartý arqyly naryqqa laiyqty qatysýshylardyń jumysyn ilgeriletýge múmkindik beremiz. Tiisti sharalar qabyldanǵannan keiin nesie kólemi aitarlyqtai artady dep oilaimyz. Bul kórsetkish 2019 jyly 10 paiyzǵa ósedi dep boljamdap otyrmyz. Bul nominaldy ishki jalpy ónimnen joǵary. Tiisinshe, nesielerdiń qol jetimdiligi artyp, birte-birte jaǵdai jaqsara túsedi. Biz keleshekte problemalar týyndatýy múmkin kúrt ósimnen góri teńgerimdi ósimdi maqul kóremiz, – dedi Nursultan Nazarbaev.
Kezdesý sońynda Qazaqstan Prezidenti birqatar naqty tapsyrma berdi.
