Memleket basshysy Ulttyq bank tóraǵasy Daniiar Aqyshevti qabyldady, dep habarlaidy "Ult aqparat" Aqordaǵa silteme jasap.
Nursultan Nazarbaev Ulttyq bank tóraǵasynyń baiandamasynan buryn barsha qazaqstandyqtardy ulttyq valiýtamyz – teńgeniń 25 jyldyǵymen quttyqtady.
– Barsha qazaqstandyqtardy jáne qarjy sektorynyń búkil qyzmetkerlerin tól teńgemizdiń 25 jyldyǵymen quttyqtaimyn. Kúrdeli kezeńderdi eńserdik. Teńgeni engizý arqyly Qazaqstannyń qarjylyq táýelsizdigine jol ashtyq. Qazir biz damýdyń jańa kezeńine qadam bastyq, – dedi Elbasy.
Ulttyq bank tóraǵasy Qazaqstan Prezidentine valiýta-qarjy naryǵyndaǵy qazirgi ahýal men elimizdiń ekonomikalyq damýynyń negizgi kórsetkishteri týraly málimdedi.
– 2018 jylǵy qazan aiynda infliatsiia sońǵy 3 jyldaǵy eń tómengi 5,3 paiyz deńgeiinde boldy. Jyl basynan bergi infliatsiia 3,7 paiyzdy qurady. Bizdiń 2018 jylǵa jasaǵan boljamymyz boiynsha onyń deńgeii 5-ten 7 paiyzǵa deiingi aralyqta bolady, – dedi D.Aqyshev.
Ulttyq bank tóraǵasy Memleket basshysyna infliatsiianyń qazirgi deńgeiine yqpal ete alatyn negizgi faktorlar jóninde aitty.
– Birinshiden, bul – ekonomikadaǵy infliatsiialyq qalypty saqtaý. Biz baǵanyń ósýine jol bermeý úshin Úkimetpen birlese jumys istep jatyrmyz. Baǵanyń sýbektivti faktorlardyń yqpalymen ózgerip otyrǵan naryqtardy anyqtaý úshin belsendi jumys júrgizilýde. Ekinshi faktor – bizdiń saýda salasyndaǵy seriktesterimiz sanalatyn elderdegi ahýal, – dedi D.Aqyshev.
Sonymen qatar, Qazaqstan Prezidentine ulttyq valiýta baǵamy tóńiregindegi jaǵdai jóninde málimdeldi. Ulttyq bank tóraǵasynyń aqparatyna sáikes, qýat kózderiniń qazirgi ýaqyttaǵy quny qalypty, bul aiyrbas baǵamynyń turaqtylyǵyn qamtamasyz etýge múmkindik beredi.
D.Aqyshev elimizdiń altyn-valiýta rezerviniń ahýaly týraly baiandady. Atap aitqanda, qazan aiynyń sońyna qarai altyn-valiýta rezerviniń kólemi 29 milliard AQSh dollaryna jetti. Al, ulttyq qordyń sheteldik valiýtadaǵy aktivteri 57 milliard AQSh dollaryna jýyqtady.
Kezdesý sońynda Nursultan Nazarbaev birqatar naqty tapsyrma berdi.
